498. அம்பரமே, தண்ணீரே, சோறே அறஞ்செய்யும் - TPV17

திருப்பாவையின் 17வது பாசுரம்

கதவு திறந்திடவும், கோபியர் உள்ளே சென்று, நந்தகோபனையும், யசோதையையும்,பலதேவரையும் சயனத்திலிருந்து எழுப்புதல்

ராகம் கல்யாணி, ஆதி தாளம்.

அம்பரமே, தண்ணீரே, சோறே அறஞ்செய்யும்
எம்பெருமான்! நந்தகோ பாலா! எழுந்திராய்;
கொம்பனார்க் கெல்லாம் கொழுந்தே! குலவிளக்கே!
எம்பெரு மாட்டி! யசோதாய்! அறிவுறாய்;
அம்பரம் ஊடறுத் தோங்கி உலகளந்த
உம்பர்கோ மானே! உறங்காது எழுந்திராய்;
செம்பொற் கழலடிச் செல்வா! பலதேவா!
உம்பியும் நீயும் உறங்கேலோ ரெம்பாவாய்.

எமக்கு ஆடையும், நீரும், பல்வகை உணவுப்பண்டங்களையும் தானமாக வாரி வழங்கும் எங்கள் தலைவரான நந்தகோபரே, தாங்கள் எழுந்திருக்கவேண்டும். வஞ்சிக் கொடி போன்ற மெல்லிய உறுதியான இடையுடைய பெண்களுக்கெல்லாம் தலைவியானவளும், நந்த குலத்திற்கு தீபம் போன்றவளும், ஸ்ரீ கிருஷ்ணரை எங்களுக்களித்த யசோதை பிராட்டியே, எழுந்தருளாய்! த்ரிவிக்ரம அவதார காலத்தில், வானளாவி ஓங்கி வளர்ந்து மூவுலகங்களையும் அளந்த தேவர் தலைவனே! விழித்தெழுவாய்! செம்பொன்னால் செய்த வீரக்கழலை அணிந்த திருவடிகளையுடைய செல்வத் திருமகனாய், பலதேவா! உன் தம்பியான கண்ணனும் நீயும் இனியும் உறங்காது எழுந்தருளவேண்டும்!


பாசுரச் சிறப்பு:

இப்பாசுரத்தில் நந்தகோபர், யசோதை, கண்ணன், பலராமன் ஆகியோர் வரிசைக் கிரமமாக எழுப்பப்படுவதை முறையே ஆச்சார்யன், திருமந்திரம், திருமந்திரத்தின் பொருள், திருமந்திரத்தின் சாரம் (அஷ்டாட்சரம், மூலமந்திரம்) ஆகியவற்றின் சின்னங்களாகக அர்த்தப்படுத்திக் கொள்ள வேண்டும் என்பது இதன் உள்ளுரையாம்.

யசோதையே, ஆயர் குலப் பெண்களுக்கு ஒரு சிறு துன்பம் வந்தாலும், மனம் கலங்குபவள். கோபியரின் உள்ளுணர்வுகளை புரிந்து கொள்ளும் திறம் படைத்தவள்.அதனாலேயே, அவளை கொம்பனார்க்கெல்லாம் கொழுந்து என்றும், குல விளக்கு என்றும், அது போலவே ஆயர் குலத்தைக் காத்து, ஆயர் குலத்தவருக்கு வேண்டியதை தந்து அருளும் நந்தகோபர் எம்பெருமான் என்றும், (அதாவது, அவ்விருவருவரையும் பரமனுக்கும், பெரிய பிராட்டிக்கும் இணையான) மிக உயர்ந்த இடத்தில் வைத்து ஆண்டாள் கொண்டாடிப் பாடியுள்ளார்!

இன்னொன்று கவனிக்க வேண்டும், நந்தகோபருக்கு (அவரது தானம், பராக்கிரமம் மற்றும் செல்வத்தை முன்னிட்டு) திருப்பாவையில் 5 தடவை மங்களாசாசனம் செய்யப்படுள்ளது.

கூர்வேல் கொடுந்தொழிலன் நந்தகோபன் குமரன்*

நாயகனாய் நின்ற நந்தகோபன் உடைய* கோயில் காப்பானே.

எம்பெருமான் நந்தகோபாலா எழுந்திராய்*

நந்தகோபன் மருமகளே நப்பின்னாய்*

ஆற்றப்படைத்தான் மகனே அறிவுறாய்!

அம்பரம் என்பது பரமபதத்தையும், தண்ணீர் என்பது வைகுண்டத்தில் பாயும் விராஜ நதியையும், சோறு என்பது உபநிடத ஞானத்தையும் குறிப்பில் உணர்த்துவதாக அன்னங்கராச்சார் சுவாமிகள் சொல்லும்போது, நந்தகோபன் பகவத் அனுபவத்தை அருள வல்லதொரு ஆச்சார்யனாகிறார்! ஆக நந்தகோபனை முதலில் எழுப்பவதாகச் சொல்வதன் மூலம், நமது உண்மையான ஸ்வரூபத்தை உணர, ஆச்சார்யனின் பங்கே முதன்மையானது என்பது வலியுறுத்தப்படுகிறது!

இன்னொரு விதத்தில், அம்பரம் என்பது ஆத்மசுத்தியையும், தண்ணீர் என்பது அதை வளர்க்க வல்ல (அகந்தை, அஞ்ஞானத்தை விலக்கி) உபாயத்தையும், சோறு என்பது பரம புருஷார்த்தத்தையும்(முக்தி) குறிப்பில் உணர்த்துவதாம். இம்மூன்றையும் அளிக்கவல்லவன் ஆச்சார்யனே என்பதால், நந்தகோபன் ஆச்சார்யன் ஆகிறான்...

"அம்பரமே தண்ணீரே சோறே" எனும்போது, தனது தந்தையான நந்தகோபாரைப் போலவே, கிருஷ்ணனும் திரௌபதிக்கு (அவள் மானத்தைக் காக்க) ஒரு தடவை வஸ்திரம் வழங்கியதியும், குருஷேத்திர யுத்தத்தில் அர்ஜுனனின் தேரோட்டியாக இருந்து குதிரைகளுக்கு தண்ணீர் வழங்கியதையும், கோகுலத்தில் சிறுவனாக வாழ்ந்தபோது, தனது நண்பர்களுக்கு வெண்ணெய் தந்ததையும் எண்ணிப் பார்க்க முடிகிறது இல்லையா?

நியாயமாக, "அம்பரமும் தண்ணீரும் சோறும்" என்று தானே இலக்கண சுத்தமாக ஆண்டாள் பாடியிருக்க வேண்டும்! ஆனால், "அம்பரமே தண்ணீரே சோறே" என்று பாடுவதன் வாயிலாக ஆண்டாள் இரண்டு விஷயங்களை உணர்த்துகிறார்!

1. இம்மூன்றில் ஏதாவது ஒன்றைக் கேட்டால் கூட, மற்ற இரண்டையும் சேர்த்தே வழங்குவார் நந்தகோபர் என்பது சொல்லித் தெரிய வேண்டியதில்லை.
2. இம்மூன்றையும் ஆயர் குலத்தவருக்கு அவர்க்கு வேண்டிய அளவுக்கு மேலாக வாரி வழங்குவார் என்பது.

மேலும், "அம்பரமே தண்ணீரே சோறே அறஞ்செய்யும் எம்பெருமான் நந்தகோபாலா" என்று கோபியர் பாடுபோது, அவர்கள் அப்பொருட்களை வேண்டி அவரிடம் வரவில்லை! கோபியர்க்கு ஆடையாகவும், நீராகவும், உணவாகவும் (எல்லாம் ஆகவும்) இருக்கும் கண்ணனை தங்களுடன் அனுப்பி தங்களை உய்விக்குமாறு, நந்தகோபரிடம் வேண்டுவதாக பார்க்க வேண்டும்! அதோடு, நந்தகோபரை "எம்பெருமான் நந்தகோபாலா" என்று கோபியர் பகவானின் திருநாமத்தைச் (கோபாலா!) சொல்லி அழைப்பதிலிருந்தே அவர்கள் வந்திருப்பது கண்ணனுக்காகவே என்பது தெளிவு!

நம்மாழ்வார் இவ்விஷயத்தைத் தானே, "உண்ணும் சோறு, பருகுநீர், தின்னும் வெற்றிலை எல்லாமும் கண்ணனே" என்று கடலை ஒத்த பேரன்போடு ஒரு பாசுரத்தில் அருளியிருக்கிறார்! இத்தனைக்கும் குருகையூர் கோன் ஒரு புளியமரப் பொந்தில், ஆகாரம், நீர் இன்றி 16 ஆண்டுகள் யோக நிலையில் வீற்றிருந்தவர் என்பதையும் இங்கு குறிப்பிட வேண்டும் :-)

ஸ்ரீவைஷ்ணவத்தின் மூன்று ரகசியங்கள் குறிப்பில் வெளிப்படுவதாகவும் பெரியோர் கூறுவர்

அம்பரம் = ஓம் (ப்ரணவம்)
தண்ணீர் = நமோ (சரணாகதி)
சோறு = நாராயணா (பரத்துவம்)

இப்பாசுரத்தில் திரிவிக்ரம அவதாரம் (அம்பரம் ஊடறுத் தோங்கி உலகளந்த உம்பர்கோ மானே!) போற்றப்பட்டுள்ளது. ஸ்ரீகிருஷ்ண அவதாரத்தைப் போலவே வாமன அவதாரமும் அதன் சௌலப்யத்தால், ஆண்டாளைக் கவர்ந்த ஒன்று என்பதால் தானோ, திருப்பாவையில் 3 இடங்களில் அது போற்றப்பட்டுள்ளது!

ஓங்கி உலகளந்த உத்தமன் பேர் பாடி*

அம்பர மூடறுந்தோங்கி உலகளந்த உம்பர் கோமானே

அன்று இவ்வுலகம் அளந்தாய் அடி போற்றி!

இதில் ஒரு தாத்பர்யமும் உள்ளது. கோபியர் காணும் கண்ணனின் சயன கோலமானது (ஒரு காலை நிலத்தில் வைத்து மற்றதை அதன் மேல் வைத்திருப்பது) அவர்களுக்கு பரமனின், மண்ணும் விண்ணும் அளந்த, திரிவிக்ரம கோலத்தை ஞாபகப்படுத்துவதாக அமைந்தது என்பதை ஆண்டாள் நயமாகப் பாடுவதாக நாம் எண்ண முடியும் தானே! மேலும், திரிவிக்ரம அவதார கோலத்தைக் காணும் பெரும்பேறு பெற்ற தேவர்கள் பலரே, கோகுலத்தில் கோபியராக பிறப்பெடுத்து கண்ணனின் அருகாமையில் இருக்கும் நற்கதி பெற்றனர் என்பதும் நமக்குத் தெரிந்தது தானே!

இங்கே திரிவிக்ரம அவதாரத்தைப் பாடி கோதை நாச்சியார் கண்ணனை துயிலெழுப்புகிறார்,அவரது தந்தையான பெரியாழ்வாரோ, தனது தாலாட்டில் அதைச் சுட்டிக் காட்டி, கண்ணனை உறங்கச் சொல்கிறார் :-)

மாணிக்கம் கட்டி *வயிரம் இடைகட்டி*
ஆணிப்பொன்னால் செய்த *வண்ணச் சிறுத்தொட்டில்*
பேணி உனக்குப்* பிரமன் விடுதந்தான்*
மாணிக்குறளனே. தாலேலோ*
வையமளந்தானே. தாலேலோ.

நந்தகோபரையும் யசோதையும் எழுப்பிய பின், கோபியர் கண்ணனை எழுப்பச் சென்று, அவன் கண் விழிக்காதபோது, பலராமருக்கு முன் கண்ணனை எழுப்ப முனைந்த தங்கள் தவறை உணர்ந்து, இருவரையும் சேர்த்து துயிலெழுப்புவதாக ஆண்டாள் நாச்சியார் பாடியிருப்பது ரசமான ஒன்று.

அதோடு, இருவரையும் சேர்த்து எழுப்புவது போல பாடி, ஆண்டாள் பகவத் சேவையும், பாகவத சேவையும் பிரிக்க முடியாவை என்பதை அழகாகச் சொல்லி விடுகிறார்! மேலும், பலராமனின் திருவடிகள் போற்றப்படுவதில் ஒரு உள்ளர்த்தம் இருக்கிறது.

ராமாவதாரத்தில், இலக்குமணன் பரமனுக்குப் பின் அவதரித்து, அவனுக்கு சேவை செய்தவன். ஆனால், பலராமனோ, கண்ணனுக்கு முன் பிறந்து அவனுக்கு சேவை செய்தவன். தேவகியின் வயிற்றில் உதித்து தன் திருவடி சம்பந்தத்தால், தனக்குப் பின்னால் பிறக்கப் போகும் எட்டாவது குழந்தைக்கு, மற்ற 6 குழந்தைகளுக்கும் ஏற்பட்ட கதி வராமல், அவள் வயிற்றை புனிதமாக்கிய பேறு பெற்றவன் பலராமன். அதாவது பலராமனின் திருவடி சம்பந்தமே, கிருஷ்ணன் இப்பூமியில் அவதரித்து, கம்சனை அழித்து தர்மத்தை நிலைநாட்டியதில் ஒரு முக்கியக் காரணமாய் அமைந்தது!

"செம்போற் கழலடிச் செல்வா பலதேவா உம்பியும் நீயும் உறங்கு ஏலோர் எம்பாவாய்" எனும்போது, பகவான் மற்றும் அவனது அடியார்கள் ஆகிய இருவரின் அருளையும் இறைஞ்சுவது என்பது உள்ளுரையாம்!

குருபரம்பரை சம்பிரதாயப்படி, இப்பாசுரம் எம்பெருமானாரை (எந்தை ராமனுச முனியை) துயிலெழுப்புவதாகச் சொல்வதும் ஒரு ஐதீகம்! ஆண்டாளுக்கு "பெரும்புதூர் மாமுனிக்கு பின்னானாள் வாழியே!" என்று வாழ்த்து பாடுவது வழக்கம். அடியவர் வாழ்வை உய்விக்க அவதரித்ததால், அடிவர்க்கு "அம்பரமே தண்ணீரே சோறே" என்று கோதை நாச்சியார் இப்பாசுரத்தில் அவரை போற்றுவதாகக் கொள்ளலாம்!

எம்பெருமானாரே, வைணவ அடியார்க்கு திருமந்திரம், த்வயம், சரம சுலோகம் என்ற மூன்றாகவும் இருப்பதாக அண்ணங்கராச்சார் சுவாமிகள் கூறுவார். அது போலவே, இப்பாசுரத்தில் துயிலெழுப்படும் பலராமரும், எம்பெருமானாரும் ஆதிசேஷ அவதாரங்கள் தானே!

எ.அ.பாலா

நாயகனாய் நின்ற நந்தகோபன் - TPV16

இது திருப்பாவையின் 16-வது பாசுரம்.

நாயகனாய் நின்ற நந்தகோபன் உடைய*
கோயில் காப்பானே. கொடி தோன்றும் தோரண-
வாயில் காப்பானே.* மணிக் கதவம் தாள் திறவாய்*
ஆயர் சிறுமியரோமுக்கு* அறை பறை-
மாயன் மணி வண்ணன் நென்னலே வாய் நேர்ந்தான்*
தூயோமாய் வந்தோம் துயில் எழப் பாடுவான்*
வாயால் முன்னம் முன்னம் மாற்றாதே அம்மா.* நீ-
நேய நிலைக் கதவம் நீக்கேலோர் எம்பாவாய்

பொருளுரை:

நமக்குத் தலைவனாய், அரணாய், அரசனாய் இருக்கும் நந்தகோபன் எழுந்தருளியுள்ள கோயிலுக்குக் காவலானாய் நிற்பவனே ! மலர் மாலைகளால் அலங்கரிக்கப்பட்ட அழகிய தோரண வாயிலைக் காத்து நிற்பவனே ! ஆயர்பாடியில் வாழும் கோபியருக்கு வேண்டி, மாணிக்க மணிகள் பதிக்கப்பட்ட வாயிற்கதவைத் திறந்திடுக !


உணர்வதற்கரிய அதிசய குணங்களை உடையவனும், அதிசயமான காரியங்களை நிகழ்த்துகின்ற மாயனும், நீலத் திருமேனி கொண்ட மணிவண்ணனும் ஆன எம்பெருமான், நோம்புக்கான பறையை அருளுவதாக எங்களுக்கு நேற்றே வாக்களித்துள்ளான் ! அக்கண்ணபிரானை துயிலெழுப்ப நாங்கள் தூய உடலோடும் உள்ளத்தோடும் வந்திருக்கிறோம்.

ஆகவே, முதற் காரியமாக, சச்சரவு செய்யாமல், மறுப்பு தெரிவிக்காமல், காவலனான நீ, பிரம்மாண்டமான வாயிற்கதவைத் திறந்து, நாங்கள் நோன்பிருந்து கண்ணனை வணங்கி வழிபட அனுமதி தர வேண்டும்.

பாசுர விசேஷம்:

1. பிரமாணம், பிரமேயம் மற்றும் பிரமாதா ஆகிய மூன்றும் இப்பாசுரத்தின் உட்பொருளில் வெளிப்படுவதாகப் பெரியோர் கூறுவர்.

2. பிரமாணம்: வேதம், ஸ்மிருதி, புராண இதிகாசங்கள், திவ்யபிரபந்தம், பிரம்ம சூத்ரம் ஆகியவை
பிரமேயம்: பரமபதத்தில் வீற்றிருக்கும் ஸ்ரீமன் நாராயணன், வியூகம், விபவம், அர்ச்சை, அந்தர்யாமி
பிரமாதா: ஆச்சார்யர்கள்
சுருங்கச் சொன்னால், பிரமாணம் மூன்று மந்திரங்களையும், பிரமேயம் எம்பெருமானையும், பிரமாதா, மந்திரங்களை உபதேசிக்கும் ஆச்சார்யனையும் குறிக்கின்றன. எம்பெருமானைப் பற்ற மந்திரம், பரதேவதா, ஆச்சார்யன் ஆகிய மூன்றின் பேரிலும் பரிபூர்ண நம்பிக்கை அவசியம் என்பது வலியுறுத்தப்பட்டுள்ளது.

3. இப்பாசுரத்தில்
கோயில் காப்பான் - மூல மந்திரம்
கொடி தோன்றும் தோரண வாயில் காப்பான் - த்வயம்
நென்னலே வாய் நேர்ந்தான் - சரம ஸ்லோகம்

4. 'மணிக்கதவம் தாள் திறவாய்' என்பது மேற்கூறிய மூன்று மந்திரங்களை உபதேசிக்குமாறு ஒரு சிஷ்யன் ஆச்சார்யனை வேண்டுவதை உள்ளர்த்தமாகக் கொண்டுள்ளது.

5. இப்பாசுரத்தில் கோபியர்கள் 'தூயோமாய் வந்தோம்' என்று சொல்லும்போது, முக்காரண சுத்தியுடன் (வாக்கு, மனம், உடம்பு) பகவானிடம் வந்துள்ள அடியார்களாக தங்களை அறிவித்துக் கொள்கின்றனர்.

6. 'துயிலெழப் பாடுவான்' என்பது, எம்பெருமானை போற்றிப் பாடித் தொழுது, அதன் வாயிலாக உலக பந்தங்களிலிருந்து விடுபடும் மார்க்கத்தை உட்பொருளாக வலியுறுத்துகிறது !

7. சிஷ்யனானவன், ஓர் ஆச்சார்யனை அடைந்து உபதேசம் பெறத் தயாராகும் கணத்திலேயே, எம்பெருமானின் கருணைக்கு பாத்திரமாகி விடுகிறான் என்ற உட்கருத்தை ' மாயன் மணிவண்ணன் நென்னலே வாய் நேர்ந்தான்' என்பது குறிக்கிறது.

8. 'நேய நிலைக் கதவம்', தடங்கலின்றி வளரும் (பகவான் மேல் வைத்திருக்கும்) அன்பையும், பக்தியையும் குறிக்கிறது.

என்றென்றும் அன்புடன்
பாலா

*** 274 ***

497. எல்லே! இளங்கிளியே! இன்னம் உறங்குதியோ! - TPV15

திருப்பாவை பதினைந்தாம் பாடல்

பேகடா ராகம், மிச்ரசாபு தாளம்

எழுந்திராமல் வாயாடுவதை விடுத்து எங்களுடன் சேர்ந்து மாயனைப் பாட வருவாயாக!

எல்லே! இளங்கிளியே! இன்னம் உறங்குதியோ!
சில்லென்றழையேன் மின் நங்கைமீர்! போதருகின்றேன்!
வல்லை உன் கட்டுரைகள் பண்டே உன் வாயறிதும்
வல்லீர்கள் நீங்களே நானே தானாயிடுக!
ஒல்லை நீ போதாய் உனக்கென்ன வேறுடையை
எல்லாரும் போந்தாரோ? போந்தார் போந்தெண்ணிக் கொள்
வல்லானைக் கொன்றானை, மாற்றாரை மாற்றழிக்க
வல்லானை, மாயனைப் பாடேலோ ரெம்பாவாய்.

குறிப்பு: கோபியரை துயிலெழுப்பும் பத்து (6-15) பாசுரங்களில் இது கடைசிப் பாசுரம். சென்ற பாடல் வரை ஆண்டாள் கோபியரை துயிலெழுப்பிக் கொண்டிருந்தாள். முதல் முறையாக இப்பாடலில் உறக்கம் விட்டெழுந்த கோபி ஒருத்தியுடன் ஆண்டாள் உரையாடுவதைக் காணலாம். ஒன்றை கவனிக்க வேண்டும், உறங்கும் கோபியரை எழுப்ப கோதை நாச்சியாரே 10 பாசுரங்கள் பாந்தமாய் பாட வேண்டியிருந்தது :-) இப்போது எழுந்தவளும் உடனே தயாராகாமல் என்ன பேச்சு பேசுகிறாள் பாருங்கள் !

பொருளுரை:

எல்லே! இளங்கிளியே! இன்னம் உறங்குதியோ!
[எழுப்புபவர்] "இளங்கிளி போல பேச்சுடையவளே! இன்னமும் உறங்குகின்றாயோ?"

சில்லென்றழையேன் மின் நங்கைமீர்! போதருகின்றேன்!
[எழுந்திருப்பவர்] "அறிவார்ந்த என் தோழிமாரே! 'சில்' என்று மிக்க கூச்சலிட்டு என்னைக் கூப்பிட வேண்டாம். இதோ வந்து கொண்டே இருக்கிறேன்"

'மிளகாய் (சில்லென்று) போல காரமான சொற்கள் கூறி என்னைக் கூப்பிடாதீர்கள்' என்று நேரடியாகவே பொருள் கொள்ளலாம் :)

வல்லை உன் கட்டுரைகள் பண்டே உன் வாயறிதும்[எழுப்புபவர்] "திறம்பட நீ உதிர்க்கும் உறுதிமொழிகளையும் உன் பேச்சு திறனையும் நாங்கள் வெகு காலமாகவே அறிவோமே"

வல்லீர்கள் நீங்களே நானே தானாயிடுக!
[எழுந்திருப்பவர்] "நீங்கள் தான் பேச்சுத் திறனுடையவர்கள்! சரி விடுங்கள், நீங்கள் கூறியபடி நானே வாயாடியாக இருந்து விட்டுப் போகிறேன்"

ஒல்லை நீ போதாய் உனக்கென்ன வேறுடையை[எழுப்புபவர்] "விரைவாகத் தயாராகி எங்களுடன் சேர்ந்து கொள். வேறு எதைப் பற்றி இன்னும் யோசித்துக் கொண்டிருக்கிறாய்?"

எல்லாரும் போந்தாரோ?
[எழுந்திருப்பவர்] "எல்லாப் பெண்களும் வந்துவிட்டார்களா?"
போந்தார் போந்தெண்ணிக் கொள்
வல்லானைக் கொன்றானை, மாற்றாரை மாற்றழிக்க
வல்லானை, மாயனைப் பாடேலோ ரெம்பாவாய்.
[எழுப்புபவர்] "அனைவரும் வந்து விட்டனர். நீயே வந்து எண்ணிப் பார்த்துக் கொள்ளேன்! (கம்சனின் மாளிகையின் வாசலில் தன்னை மிதித்தழிக்கக் காத்திருந்த) குவலயாபீடம் எனும் யானையைக் கொன்று, கம்சன், சாணூரன், முஷ்டிகன் ஆகிய பகைவர்களின் அகந்தையை அழித்தவனும், மாயச்செயல்கள் புரிந்து நம்மை ஆட்கொள்ளுபவனும் ஆன கண்ணனின் புகழைப் பாட விரைவில் எழுந்து வருவாயாக"

பாசுரச் சிறப்பு:

பெரியோர் இப்பாசுரத்தை "திருப்பாவையிலும் திருப்பாவை" என்று போற்றுவர். அதற்கு முக்கியக் காரணம், "நானே தான் ஆயிடுக" என்ற வாக்கியமாம். இதற்கு ஆழ்ந்த உட்பொருள் உள்ளது. எளிமையாகச் சொன்னால், இல்லாத குற்றத்தை ஒருவர் நம் மீது சுமத்தும்போது கூட, அதை மறுக்காமல் நமது குற்றமென்று இசைவதே ஒரு வைணவனின் குணமாகும் என்ற தாத்பர்யத்தை இந்த ஒரு வாக்கியம் சொல்லி விடுகிறது!

இதற்கு முன்னால் வந்த 9 துயிலெழுப்பும் பாசுரங்கள் போல் அல்லாமல், இப்பாசுரம் உரையாடல் நடையில் பாடப்பட்டு, மிக சுவையாக, பாகவத கைங்கர்யம் (அடியார் சேவை) பகவான் சேவையினும் சிறந்தது என்பதை வலியுறுத்துகிறது!

பகவத் சேவையும், அவனது திருவடியில் சரணடைதலும் "சிற்றம் சிறுகாலே வந்துன்னை சேவித்து" என்று திருப்பாவையில் இறுதியில் (29வது பாசுரத்தில்!) தான் ஆண்டாளால் கொண்டாடப்படுகிறது. அதற்கும் முன்னாலே இந்த 15வது பாசுரத்திலேயே, கோதை நாச்சியார் பாகவத சேவையைக் கொண்டாடி, சரணாகதித்துவத்தில் பாகவத சேவையின் உன்னதப் பங்கை சொல்லி விடுகிறார்!

அடியாருக்கு அடியாராக இருப்பவரே பகவானுக்கு உகந்தவர், நெருக்கமானவர்! திருப்பாணாழ்வார் கூட அரங்கனை "அடியார்க்கு என்னை ஆட்படுத்த விமலன்" என்று தானே போற்றிப் பாடுகிறார்.

குருகையூர் கோன் நம்மாழ்வார் தனது திருவாய்மொழியில், அடியார்க்கு அடியாராக இருப்பதில் உள்ள பெருஞ்சிறப்பை, அவருக்கே உரித்தான பக்திப் பேருவகையோடு பாடியிருக்கிறார்!அடியார்ந்த வையமுண்டு* ஆலிலை அன்ன வசஞ்செய்யும்,*
படியாதுமில் குழவிப்படி* எந்தைபிரான் தனக்கு,*
அடியார் அடியார் தம்* அடியார் அடியார் தமக்கு*
அடியார் அடியார் தம்,*அடியார் அடியோங்களே.
3.7.10

மேலே உள்ள பாசுரத்தில் "அடியார்" என்பது ஏழு முறை சொல்லப்பட்டிருப்பது, "சப்த பர்வ தாஸ்யத்வம்" எனப்படுகிறது. அதாவது, ஏழு பிறப்புகளிலும் வைணவ அடியார்க்கு தொண்டு செய்யும் பாக்கியத்தை வரமாக பரமனிடம் வேண்டுவது இதன் உள்ளுரையாம்!வாய்க்க தமியேற்கு* ஊழிதோறூழி ஊழி*மாகாயாம்-
பூக்கொள் மேனி நான்குதோள்* பொன்னாழிக்கை என்னம்மான்*
நீக்கமில்லா அடியார்தம்* அடியார் அடியார் அடியார் எங்கோக்கள்*
அவர்க்கே குடிகளாய்ச் செல்லும்* நல்ல கோட்பாடே.
8.10.10

மேலும், அடியவர் சேவை என்பது உபதேசத்தால் விவரிக்க முடியாதது. அதைக் கடைபிடிப்பவர்களாலேயே அதை உணர முடியும். அதனாலேயே, பாசுரத்தை 'அடியவர் சேவை' பற்றிய ஒரு அறிவுரையாகப் பாடாமல், சம்பாஷணை வடிவில் சொல்லி, அடியவர் சேவையின் சிறப்பை குறிப்பில் உணர்த்துகிறார்.

அடியார் குழாம் சூழ, பரமனின் திருவடிகளைப் பற்றி வழிபடுவதையே ஸ்ரீவைஷ்ணவம் மிக உயரியதாகக் கருதுகிறது. அவ்விஷயத்தையும், இப்பாசுரம் குறிப்பில் உணர்த்துவதாகக் கொள்ளலாம். ஆண்டாளின் தந்தையான பெரியாழ்வாரே, "எங்கள் குழாம் புகுந்து கூடு மனமுடையீர்" என்று அடியவர்களை அழைத்திருக்கிறார் தானே :)
ஒரு உத்தம ஸ்ரீவைஷ்ணவனின் பத்து குணாதிசயங்கள் இப்பாசுரத்தில் சொல்லப்பட்டுள்ளன.

எல்லே இளங்கிளியே - நற்பேச்சு

இன்னும் உறங்குதியோ - அடியவர் அருகில் இருக்கையில், அவர் சேவையை விடுத்து வேறு எந்த செயலிலும் ஈடுபடலாகாது

சில்லென்றழையேன் மின் - அடியவருடன் உரையாடும்போது, சுடு சொற்களை பயன்படுத்துவது தகாது!

நங்கைமீர்! போதருகின்றேன் - அடியவரை மரியாதையுடனும், அடக்கத்துடனும் அணுக வேண்டும்

வல்லை உன் கட்டுரைகள் - அடியவர், நம்மீது சொல்லும் குறைகளை பிணக்கின்றி மனதார ஏற்றுக் கொள்ள வேண்டும்!

வல்லீர்கள் நீங்களே நானே தானாயிடுக! - இல்லாத குற்றத்தை ஒருவர் நம் மீது சுமத்தும்போது கூட, அதை மறுக்காமல் நமது குற்றமென்று இசைய வேண்டும்

ஒல்லை நீ போதாய் - அடியவரை ஒரு கணமும் பிரியலாகாது, அவர்களை காக்க வைக்கலாகாது!

உனக்கென்ன வேறுடையை - வைணவ சாத்திரங்கள் சொல்லும் வழிமுறைகளிலிருந்து மாறாமல் நடத்தல் வேண்டும், நம் மனம் போனபடி அல்ல!

எல்லாரும் போந்தாரோ? போந்தார் போந்தெண்ணிக் கொள் - அடியவர் கூட்டத்தைக் காண்பதும், அதில் சேர்வதுமே பரமனைப் பற்றுவதற்கான உபாயமாகும்!

வல்லானைக் கொன்றானை, மாற்றாரை மாற்றழிக்க வல்லானை, மாயனைப் பாட - பரந்தாமனின் கல்யாண குணங்களைப் போற்றிப் பாடுவது, அடியவரை மிகுந்த மகிழ்ச்சியில் ஆழ்த்தும் என்பதால், இதுவே, அடியவர் சேவையின் உன்னத விஷயமாகக் கொண்டாடப்படுகிறது.


இப்பாசுரத்திற்கு இன்னொரு உள்ளுரையும் உண்டு.

இளங்கிளியே - சம்சார பந்தத்தில் உழலும் பக்தன்

இன்னம் உறங்குதியோ - பல பிறவிகள் எடுத்தும், ஆச்சார்யனிடம் புருஷார்த்தம் (ஞானம்) பெற முடியாத தன்மை

எல்லே - ஆச்சர்யத்தை (அதாவது, உலகப்பற்று, அஞ்ஞானம் ஆகியவற்றில் உழலும் பக்தனுக்குக் கூட கற்றறிந்த அடியவர் சம்பந்தம் ஏற்படப் போகும் ஆச்சர்யத்தை) குறிப்பில் உணர்த்துவதாம்!

நங்கைமீர் - ஞானமிக்க அடியார்களே!

சில்லென்றழையேன் மின் - எனது அஞ்ஞானத்தால் தவறிழைப்பின், அதற்காக கடிந்து கொள்ளதீர்

போதருகின்றேன் - சத்விஷயங்களில் (பகவத், பாகவத, ஆச்சார்ய சேவை) என்னை ஈடுபடுத்திக் கொள்கிறேன்.

வல்லை உன் கட்டுரைகள் பண்டே உன் வாயறிதும் - வைணவ ஆச்சார்யர்கள் சொன்ன நற்கதைகளையும், உபதேசங்களையும் மனதில் நிறுத்தி

வல்லீர்கள் நீங்களே - அடியவர் நீங்களும் சத்விஷயங்களை என்னிடம் பகிர்ந்து கொண்டுள்ளீர்கள்

நானே தான் ஆயிடுக - மனதில் வைராக்கியம் இன்றி, விஷய சுகங்களில் நான் திளைக்கிறேன்

ஒல்லை நீ போதாய்! (குழுமியுள்ள அடியவர்கள் கூறுவது) - வைராக்கியத்தோடு உலகப் பற்றைத் துறந்து, கைவல்யத்தைக் காட்டிலும் மோட்ச சித்தியே சிறந்தது என்றுணர்ந்து, பகவத் சேவைக்கு வருக!

எல்லாரும் போந்தாரோ - மற்ற அடியவர் அனைவரும் இவ்வழியைத் தான் அனுசரிக்கிறார்களா ?

போந்தார் போந்தெண்ணிக் கொள் (குழுமியுள்ள அடியவர்கள் கூறுவது) - ஆமாம், அடியவர் அனைவரும் பகவத்-பாகவத சேவையின் வாயிலாக பேரின்பத்தை நாடுவதே உயரியது என்றுணர்ந்து விட்டனர். நீ வெளியே வந்தால், அது உனக்கும் புரிந்து விடும்!

வல்லானைக் கொன்றானை, மாற்றாரை மாற்றழிக்க வல்லானை, மாயனைப் பாட - நம் தீவினைகளை அழித்து, நம்மை மாயையிலிருந்து விடுவித்து, தறிகெட்டு அலையும் நம் புலன்களை நெறிப்படுத்தி, பகவத்-பாகவத சேவையில் நம்மை ஈடுபடுத்தி நம்மை ஆட்கொள்ளவிருக்கும் பரமனின் திருவடியைப் போற்றிப் பாடுவோமாக!*****************************

எட்டடிகள் கொண்ட பாசுரத்தில் சூடிக் கொடுத்த நாச்சியார் எத்தனை செய்திகளை தருகிறார், பாருங்கள். அதனால் தான், நாலாயிரத்தில் (திவ்ய பிரபந்தத்தில்) கோதைப் பிரபந்தங்கள் உயர்வானதாகப் போற்றப்படுகின்றன. அவை இரண்டில் (நாச்சியார் திருமொழி, திருப்பாவை) திருப்பாவைக்கே வைணவ பாரம்பரியத்தில் உயரிய இடம் தரப்பட்டுள்ளது! அது போல, பாவை முப்பதில், இப்பாசுரமே மிக மிக முக்கியமானதாகக் கருதப்படுகிறது!

இப்பாசுரம் கடைக்குட்டி ஆழ்வாரான திருமங்கையாழ்வாரின் திருப்பள்ளியெழுச்சி என்று கூறுவது ஐதீகம். அதற்கான விளக்கத்தைப் பார்ப்போம்!

ஆண்டாள் இப்பாசுரத்தில் கடைபிடிக்கும் (அடியவரிடையே)சம்பாஷணை முறையை, திருமங்கையாரும், "மானமரு மென்னோக்கி" என்ற பதிகத்தை (10 பாசுரங்கள்) இரண்டு ஆய்ச்சிகளுக்கு இடையே நிகழும் சம்பாஷணையாகப் பாடியுள்ளார்!மானமரு மென்னோக்கி* வைதேவியின் துணையா,*
கானமரும் கல்லதர்போய்க்* காடுறைந்தான் காணேடீ*
கானமரும் கல்லதர்ப்போய்க்* காடுறைந்த பொன்னடிகள்,*
வானவர்தம் சென்னி* மலர்க்கண்டாய் சாழலே!

கலியப் பெருமானை "இளங்கிளியே" என்பது மிகப் பொருத்தமே, இவர் தான் ஆழ்வார்களில் இளையவர், அத்துடன் தன்னைக் கிளியாக பல பாசுரங்களில் வருணித்துக் கொண்டவர். அதை விட முக்கியமாக ஒரு கிளி செய்வதைப் போல, நம்மாழ்வாரின் உபதேசத்தை இவ்வுலகுக்கு திரும்ப உரைக்க அவதாரம் கொண்ட (மாறன் தமிழ்மறைக்கு ஆறங்கம் கூற அவதரித்த)திருமங்கையாரை "இளங்கிளியே" என்று தாராளமாக அழைக்கலாம் தானே :-)

"வல்லை உன் கட்டுரைகள் பண்டே உன் வாயறிதும்" எனும்போது ஆண்டாள் திருமங்கையார் அவதரிப்பதற்கு முன்னமே (பண்டே!) அவரது (பெரிய திருமொழி இயற்றப்போகும்!) புலமையை மனதார பாராட்டுகிறார்!

"உனக்கென்ன வேறுடையை" என்று ஆண்டாள் பாடுவது, பெரிய திருமொழி தவிர கலியபெருமான் அருளப் போகும் இரண்டு பிரசித்தி பெற்ற திருமடல்களை ஞாபகம் வந்ததால் என்று கொள்ளலாம்!

எல்லாரும் போந்தாரோ? - திருமங்கையார், தனக்கு முன்னால் மற்ற ஆழ்வார்கள் அனைவரும் அவதாரம் எடுத்து விட்டனரா என்பதை ஆண்டாளிடம் வினவுவதாகக் கொள்ளலாம்!

வல்லானைக் கொன்றானை - குவலயாபீடம் என்ற கம்சன் அனுப்பிய யானையை அழித்த கண்ணனின் லீலையை திருமங்கையாழ்வார் பல பாசுரங்களில் பாடியுள்ளார் என்பது கவனிக்க வேண்டியது.

"அவரிவை செய்கறிவார் அஞ்சனமாமலை போலே", "கவல யானை கொம்பொசித்த கண்ணனென்னும்", "வேழனும் பாகனும் வீழ" (திருவல்லிக்கேணி பற்றிய பாசுரத்தில் உள்ளது இது) என்பவை சில உதாரணங்கள்.விற்பெரு விழவும் கஞ்சனும் மல்லும் * வேழமும் பாகனும் வீழ*
செற்றவன் தன்னை புரமெரி செய்த* சிவனுறு துயர்களை தேவை*
பற்றலர் வீயக் கோல் கையில் கொண்டு* பார்த்தன் தன் தேர்முன் நின்றானை*
சிற்றவை பணியால் முடி துறந்தானைத்* திருவல்லிக்கேணிக் கண்டேனே*

மாற்றாரை மாற்றழிக்க வல்லானை, மாயனைப் பாட - பகைவரின் அகந்தையை அழிப்பதற்கு வேண்டி எம்பெருமான் லீலைகள் பல புரிபவன். அவற்றில் ஒன்று தான், கோவர்த்தன கிரியை குடையாகப் பிடித்து, மாக்களையும், ஆயரையும் காத்து, இந்திரனின் கர்வத்தை சாதுர்யமாக அடக்கியது. திருமங்கையார் இந்த கிருஷ்ண லீலையால் மிகவும் கவரப்பட்டதால் தான், தனது பெரிய திருமொழியை, "குன்றமெடுத்து ஆநிரை காத்தவன் தன்னை" என்று முடிக்கிறார்! அது போல, திருநெடுந்தாண்டகத்தை, "குன்றெடுத்த தோளினானை" என்று நிறைவு செய்கிறார்! கோதை நாச்சியாரும், ஆழ்வாருக்குப் பிடித்த அதே கிருஷ்ண லீலாவை ஞாபகப்படுத்தி இப்பாசுரத்தை நிறைவு செய்கிறார் :-)
ஆண்டாள் திருவடிகளே சரணம்!

எ.அ.பாலா

496. 'ஸ்பெக்ட்ரம்' ஓர் உலக மகா சுருட்டல் விவகாரமா?

ஸ்பெக்ட்ரம் (அலைக்கற்றை) உரிமங்கள் வழங்கிய விவகாரம் MOTHER OF ALL SCANDALS என்று சொல்லுமளவுக்கு, போஃபோர்ஸையும் மிஞ்சும் வண்ணம் உள்ளது

சமீபத்தில் ராஜ்யசபாவில், 2G ஸ்பெக்ட்ரம் உரிமங்கள் வழங்கப்பட்டது தொடர்பாக அதிமுக கேள்வி எழுப்பியது.  இப்பிரச்சினை குறித்து ஒரு கூட்டு பாராளுமன்றக் குழு (JPC) விசாரணை நடத்த அரசு உத்தரவிட வேண்டும் என்ற கோரிக்கையை அதிமுக, கம்யூனிஸ்ட், பிஜேபி கட்சி உறுப்பினர் முன் வைத்துள்ளனர்.  சமாஜ்வாடி கட்சியின் அமர்சிங் ஸ்பெக்ட்ரம் குளறுபடி பற்றி ஏற்கனவே பல சந்தேகங்களை எழுப்பியுள்ளார். 

எதிர்பார்த்தது போல, திமுக உறுப்பினர்கள் இந்த குற்றச்சாட்டுக்கு "பலத்த" எதிர்ப்பு தெரிவித்துள்ளார்கள்.  அதிமுகவின் மைத்ரேயன் கூறியபடி அரசுக்கு 100000 கோடி வருமான இழப்பு என்பது அதீதமாக இருந்தாலும், அரசுக்கு கிட்டத்தட்ட 60000 கோடி இழப்பு என்ற கணக்கீடு சரியான ஒன்றே.  மைத்ரேயன் திமுக அரசின் தலையில் ஆணி அடிக்கும் விதமாக, "இந்தத் தொகையை வைத்து, இப்போது ஒரு ரூபாய்க்கு விற்கப்படும் ரேஷன் அரிசியை, அடுத்த 140 ஆண்டுகள் இலவசமாகவே வழங்க முடியும்" என்று ஒரே போடாக போட்டார் :) [இந்தத் தொகையில் 15 ராமர் சேது கால்வாய் திட்டங்களை நிறைவேற்ற முடியும் என்பது கூடுதல் தகவல்]

அமைச்சர் ராஜா தான், தனக்கு முன்னால் இருந்த அமைச்சரின் வழிமுறைகளிலிருந்து மாறுதலாக எதுவும் செய்யவில்லை என்று கூறுவதை ஏற்க முடியாது என்றும், ஏனெனில் முன்னர் இருந்தவரும் திமுக அமைச்சரே என்றும் மைத்ரேயன் பேசினார். 

அதோடு, மத்திய கண்காணிப்புக் கமிஷன் (Central Vigilance commission) ஸ்பெக்ட்ரம் உரிமங்கள் வழங்கப்பட்டது குறித்து கேள்வி எழுப்புயுள்ளதையும், இந்தப் பிரச்சினை குறித்தான பொது நல வழக்கு ஒன்றை தில்லி உயர் நீதிமன்றம் அனுமதித்திருப்பதையும் மைத்ரேயன் சுட்டிக் காட்டினார்! ஜனதா தளம் (U) வைச் சார்ந்த சரத் யாதவும் ஸ்பெக்ட்ரம் பற்றி ஒரு முழுமையான பாராளுமன்ற விவாதம் மிக அவசியம் என்று கூறினார்.

மொத்த அலைக்கற்றைக்கு ஸ்வான் அரசுக்கு கொடுத்தது 1537 கோடி, அதில் 45%-ஐ எடிசலாட்டுக்கு விற்ற கணக்குப்படி பார்த்தால், ஸ்வான் பெற்ற அலைக்கற்றையின் நிகர மதிப்பு 10000 கோடி, அதாவது ஆறரை மடங்கு லாபத்தில் ஸ்வான் விற்றுள்ளது, மக்கள் பணம் தனியாருக்கு இப்படி தாரை வார்க்கப்பட்டுள்ளது அதிர்ச்சியாக இருக்கிறது

இதில் ஊழல் நடந்துள்ளதோ இல்லையோ, அரசுக்கு பெருத்த நஷ்டம் ஏற்பட்டுள்ளது. தொலைத் தொடர்பு அமைச்சகம், இந்த விசயத்தில் சரியாக ஆய்ந்து முடிவுகள் எடுக்கவில்லை என்பது தெளிவு. மேலும், வழங்கப்பட்ட உரிமங்களை ரத்து செய்து விடலாமா என்று அரசு ஆலோசித்து வருவதாக செய்திகள் கசிந்துள்ளன.

தொலைத் தொடர்புடன் தொடர்பில்லாத, அனுபவமில்லாத (ரியல் எஸ்டேட்) நிறுவனங்களுக்கு ஸ்பெக்ட்ரம் உரிமங்கள் வழங்கப்பட்டிருப்பதும் சர்ச்சைக்கு ஒரு முக்கியக் காரணம்.  தொலைத் தொடர்பு கம்பெனிகளின் கார்டலை (cartel) உடைக்க இது உதவும் என்று அமைச்சர் இதற்குக் காரணம் கூறியிருப்பதை நகைச்சுவையாக எடுத்துக் கொள்வது நம் உடம்புக்கு நல்லது, இல்லையெனில் பிளட் பிரஷர் எகிறி விடும் ;-)

மேலும், பிரதமர் இப்பிரச்சினை குறித்து தொலைத் தொடர்பு அமைச்சகதுக்கு எழுதியிருப்பதாக கூறப்படும் கடிதம் பற்றியும் குழப்பம் நிலவுகிறது.  அக்கடிதம் வெளியிடப்படவேண்டும் என்று பிஜேபி வலியுறுத்தியுள்ளது!

முதல்வர், ராஜா ஒரு தலித் என்பதால், இப்பிரச்சினையை வேண்டுமென்றே பெரிதாக்குகிறார்கள் என்கிறார்!  இப்படி சாதியை இதில் நுழைப்பது சரியா?  ஒரு மத்திய அமைச்சரின் நடவடிக்கை, அவர் எந்த சாதியைச் சேர்ந்தவராக இருப்பினும் (அரசுக்கு பெரும் நஷ்டம் ஏற்பட்டிருக்கிறது என்ற சூழலில்) ஜனநாயகத்தில் கேள்விக்குட்பட்டதே!  மேலும், ராஜா தன்னை தற்காத்துக் கொள்ள முடியாத ஏழ்மைச் சூழலில் இருக்கிறாரா என்ன ? இது ஒரு புறமிருக்கட்டும்.  உண்மையான நிலவரத்தையும், சில தகவல்களையும் பார்ப்போம்.

100000 கோடி என்பது, இந்தியாவின் தேசிய வருமானத்தில் நாற்பதில் ஒரு பங்கு, இது பட்ஜெட் நிதிப்பற்றாக்குறையில் (financila deficit) நான்கில் மூன்று பங்கு.  அலைக்கற்றையின் உரிமங்கள்  பெற்ற 3 இந்திய நிறுவனங்கள் (ஸ்வான் டெலிகாம், யூனிடெக் வயர்லெஸ், டாடா டெலிசர்வீஸஸ்) தங்கள் பங்குகளை அயல்நாட்டு நிறுவனங்களுக்கு விற்றபோது தான், அரசுக்கு ஏற்பட்ட பெரும் வருமான இழப்பு தெரிய வந்தது.  அதாவது, வாங்கியதை விட கிட்டத்தட்ட ஆறுமடங்கு விலைக்கு விற்றிருக்கிறார்கள்!

மேலே குறிப்பிடப்பட்ட மூன்றில் முதல் 2 கம்பெனிகளுக்கும், இந்த அலைக்கற்றை உரிமம் தவிர்த்து, சொல்லிக் கொள்ளும்படியாக சொத்து (assets) எதுவும் இல்லாத நிலையில், 1651 கோடிக்கு விற்கப்பட்ட ஒவ்வொரு உரிமத்தின் மார்க்கெட் விலை 10000 கோடிக்கும் மேல் என்பது தான் நிஜம்.

இது இப்படியிருக்க, நிதியமைச்சகமே, அரசுக்கு ஏற்பட்ட வருமான இழப்பை (தனது உள்தொடர்பு குறிப்பொன்றில்) ஒப்புக் கொண்டுள்ளது! அதாவது, அக்குறிப்பு, இழப்பு 22466 கோடி என்கிறது. இல்லை, மூன்று மடங்கு நஷ்டம் என்று சந்தைச் சூழலை வைத்து வல்லுனர்கள் கூறுகிறார்கள். எது எப்படியோ, 22000 கோடி என்பதே பெரும் வருமான இழப்பு தானே!  அது போல, பாரதி, வோடஃபோன், ஐடியா போன்ற நிறுவனங்களுக்கு வழங்கப்பட்ட கூடுதல் அலைக்கற்றையிலும், அரசுக்கு சுமார் 20000 கோடி வருமான இழப்பே.  இது குறித்து அமர்சிங் பிரதமருக்கு எழுதிய கடிதங்கள் இப்போது வெளிவந்துள்ளன, அமர்சிங் ரிலயன்ஸ் கம்யூனிகேஷன் நிறுவனத்தின் சார்பாகவே இதைச் செய்திருந்தாலும் :-)

அது போல, டெலிகாம் உரிமங்கள் ஒரு போதும் இந்தியாவில் ஏலம் முறையில் விற்கப்பட்டதில்லை என்பது தவறான தகவல்!  நான் மேலே குறிப்பிட்ட 1651 கோடி என்பது, 2001-ல் நடந்த ஏலத்தின் வாயிலாகவே நிர்ணயிக்கப்பட்டது.  7 வருடங்கள் கழித்து அதே விலைக்கு அரசு விற்பது சரியா/முறையா (அதுவும் FIRST COME FIRST SERVE அடிப்படையில், அடிதடி சூழலில்) என்பது முக்கியமான கேள்வி! 

பிஜேபி ஆட்சியில் இருந்தபோது கொண்டு வரப்பட்ட (1999 ஆண்டுக்கான)  நேஷனல் டெலிகாம் பாலிசியில் (NTP99) குறிப்பிடப்பட்டுள்ள வழிகாட்டுதல்களின்படியும் (guidelines), TRAIயின் பரிந்துரைகளின்படியும் தான் என்று அமைச்சர் கூறுவதை ஏற்றுக் கொள்ள இயலாது.  NTP99-யிலோ TRAI வெளியிட்ட பரிந்துரைக் குறிப்புகளிலோ, உரிமங்கள் வழங்க FCFS (First Come First Serve) பாலிஸி செயல்படுத்தப்பட வேண்டும் என்று கூறப்படவில்லை!  பொது ஏலத்தை விட FCFS சிறந்தது என்பதை TRAI அங்கீகரிக்கும் என்று எதிர்பார்ப்பது சற்று அதிகபட்சம் இல்லையா? :-)

மேலும், உரிமங்கள் பெறுவதற்கான (பூர்த்தி செய்யப்பட்ட) மனுக்களை அமைச்சக அலுவலகத்தில் அளிப்பதற்கு 72 மணி நேரக் கெடுவே தரப்பட்டது என்பதும் குறிப்பிடவேண்டியது.  உரிமங்கள் வழங்கிய தினத்தில், சன்சார் பவனில் நடந்த கேலிக்கூத்தையும், அடிதடியையும் பற்றி இந்தியன் எக்ஸ்பிரஸ் நாளிதழில் இப்படி வந்திருந்தது!

On January 10, at 2.45 pm, the DoT posted an announcement on its website saying letters of intent would be issued between 3.30 pm and 4.30 pm and that application fees (worth over a thousand crore rupees in many cases) would have to be paid immediately by demand draft with supporting documentation. Licences with spectrum were given to those who deposited their fees first by even a fraction of a second. In the mad melee, well-heeled CEOs were manhandled by hired bouncers and DoT staffers were bashed up before the cops turned up, late as usual.

அன்று நடந்த பெருங்குழப்பத்தை இந்து நாளிதழ் விவரிப்பதையும் பாருங்கள்:

On Thursday it was total pandemonium at Sanchar Bhawan, the office of the Department of Telecom, as representatives of wannabe telecom companies literally got into fist fights and blows in a bid to be the first to get the letter of intent.

After keeping nearly 46 applicants on tenterhooks for almost three months, when DoT on Thursday announced that letters of intent (LIs) will be issued at 3.30 p.m., all hell broke loose as the companies made a beeline to the second floor of Sanchar Bhawan where the letter was being issued.

The clamour was so shrill that a representative of one of the applicants got a hired goon to ensure that it was his company which was the first to enter the gates.  What followed could make Bollywood stunts look pale in comparison as some of the company representatives were physically thrown out of the line by rival applicant company.

இது தான், அரசுக்கு உரிமையான அரிதான/விலைமதிப்பு மிக்க ஒரு வளத்துக்கு உரிமங்கள் வழங்கும் முறையா?  மற்றொரு விஷயம், TRAI தலைவரே இந்த விவகாரத்தில் டெலிகாம் அமைச்சகத்துக்கு எதிராக பேசியிருக்கிறார். இந்த விவகாரம் குறித்து மத்திய கண்காணிப்புக் கமிஷனும் (Central Vigilance commission), CAG -வும் (Comptroller & Auditor General of India) முதல்கட்ட விசாரணை செய்து வருகிறார்கள் என்று தெரிகிறது.  நீதிமன்றங்களில் வழக்குகளும் தொடரப்படுகிறது என்பதில் ஆச்சரியம் இல்லை.  கடைசியாக வந்த செய்திகளின்படி, 3G ஸ்பெக்ட்ரம் உரிமங்கள் ஏலம் முறையில் வழங்கப்பட உள்ளன என்பது தெரிகிறது !!! ஏன் 2G அலைக்கற்றை உரிமங்கள் வழங்கியபோது இந்த ஞானோதயம் வரவில்லை என்பது நியாயமான கேள்வி தானே ???

அப்படியும், சில "நல்லவர்களும்", சில "அப்பாவிகளும்", சில "அறிவுசீவிகளும்" ஸ்பெக்ட்ரம் விவகாரத்தில் ஊழலும் இல்லை, நஷ்டமும் இல்லை என்று கதறிக் கொண்டிருப்பது காமெடியாக உள்ளது! 

 

என் எரிச்சல் எல்லாம், அரசு இழந்த இந்த வருமானத்தின் ஒரு பகுதியாவது (எப்போதும் போல, ஊழலுக்கு தண்டம் அழுதபின்) ஏழைகளுக்கான நலத் திட்டங்கள் ஒன்றிரண்டுக்காவது பயன்பட்டிருக்குமே என்பது தான்.  அரசுக்கு (பெருமளவில்)வருமான இழப்பு ஏற்படாமல் இருக்கும் பட்சத்தில், சிறிது ஊழலைக் கூட ஒப்புக் கொள்ளலாம் என்று தோன்றுகிறது :-(
--
எ.அ.பாலா

495. உங்கள் புழைக்கடைத் தோட்டத்து வாவியுள் - TPV14

திருப்பாவை பதினான்காம் பாடல்

எங்களை எழுப்புவதாகச் சொல்லிவிட்டு, அவ்வண்ணம் செய்யாது உறங்குதல் முறையோ?

உங்கள் புழைக்கடைத் தோட்டத்து வாவியுள்
செங்கழுநீர் வாய் நெகிழ்ந்து ஆம்பல்வாய் கூம்பினகாண்
செங்கல்பொடிக்கூறை வெண்பல் தவத்தவர்
தங்கள் திருக்கோயில் சங்கிடுவான் போகின்றார்
எங்களை முன்னம் எழுப்புவான் வாய் பேசும்
நங்காய்! எழுந்திராய்! நாணாதாய்! நாவுடையாய்!
சங்கொடு சக்கரம் ஏந்தும் தடக்கையன்
பங்கயக் கண்ணானைப் பாடேலோரெம்பாவாய்.

பொருளுரை:

உங்கள் வீட்டு புழக்கடைத் தோட்டத்தில் உள்ள சிறுகுளத்தில் செங்கழுநீர் மலர்கள் இதழ் விரிந்து, கருநெய்தல் மலர்கள் இதழ் குவிந்து (அழகாக) இருப்பதை காண்பாயாக! செங்கல் நிறத்தில் உடை (காவியுடை) தரித்த, வெண்மையான பற்களையுடைய தவசிகள், சங்கை முழங்கி அறிவித்தவாறு, தங்கள் திருக்கோயில்களைத் திறக்கச் செல்லுகின்றனர்.

அழகிய பெண்ணே! எங்களை முன்னரே எழுப்புவதாக நீ எங்களுக்கு வாக்களித்து விட்டு,அவ்வண்ணம் செய்யாமலிருந்தும், செய்யவில்லையே என்ற வெட்கம் துளியும் இல்லாதவளே! இனிமையான துடுக்கான பேச்சுடையவளே! துயிலெழுவாயாக! சங்கு, சக்கரம் தரித்து, விசாலமான திருக்கைகளையுடையவனும் தாமரை மலர் போன்ற சிவந்த கண்களையுடையவனுமான கண்ணபிரானின் பெருமைகளைப் பாடி நோன்பிருக்க வருவாயாக!

பாசுரச் சிறப்பு:

வெட்கத்துக்குரிய தவறுகளை இழைத்தவர் கூட, கண்ணனைச் சரணடைந்து அவனிடம் முநறயிட்டு, அவன் அருளுக்குப் பாத்திரமாக முடியும் என்பது இப்பாசுரத்தின் ஒரு செய்தி. மற்ற கோபியர்களை எழுப்புவதாகச் சொல்லிவிட்டு, அவ்வண்ணம் செய்யாமல் உறங்கிக் கொண்டிருக்கும் பெண்ணைக் கூட ஆண்டாள், கண்ணன் புகழைப் பாட அழைப்பதிலிருந்து பாசுரத்தின் செய்தியை உணரலாம்!

அப்பெண் உண்மையில் உறக்கத்தில் இல்லை, தியானத்தில் உள்ளாள்! இரவா, பகலா என்று உணராமல் கிருஷ்ணானுப ஆனந்தத்தில் திளைத்திருக்கிறாள் !!!

அத்துடன், துயிலெழுப்பப்படும் கோபியர் குலப் பெண் துடுக்காகவும், அதே சமயம் இனிமையாகவும் பேசுவதில் கை தேர்ந்தவள்! கண்ணனிடம் இனிமையாகப் பேசி வசியப்படுத்தி, தாங்கள் வேண்டிய வரங்களை கண்ணனிடமிருந்து பெற்றுத் தரும் சாதுர்யம் (உறங்கும்) பெண்ணிடம் உள்ளதாக மற்ற கோபியர் நம்பினர்! அதனாலேயே, அக்கோபியர் (தங்களை எழுப்புவதாகச் சொல்லி அப்பெண் ஏமாற்றியிருந்தாலும்!) அப்பெண்ணின் மீது மெல்லிய கோபத்தில் (நாணாதாய், நாவுடையாய்!)இருந்தாலும் அவளை தங்களுடன் கூட்டிச் செல்வதில் மிக்க ஆர்வமாக இருந்தனர் :-)

அது போலவே, "நாவுடையாய்" என்று ஆண்டாள் பாடியதில் ஓர் உள்ளர்த்தம் உள்ளது. அதாவது, நாக்கு என்பது உண்பதற்கும், வீண் பேச்சு பேசுவதற்கும் அல்ல, அதன் முக்கியப் பணி பரமனின் திருநாமங்களைப் பாடுதலும், நல்ல விஷயங்களைப் பிறர்க்குச் சொல்லுதலும் என்பதை கோதை நாச்சியார் வலியுறுத்துகிறார்!

கர்ம பலன் என்பது மனம், வாக்கு, செயல் என்ற மூன்றைச் சார்ந்தது அல்லவா? உறங்கும் கோபி நல்ல நா உடையவள் என்பதால், வாக்குத் தூய்மையும், அதற்கு காரணமான உள்ளத் தூய்மையையும் அடைந்து விட்டவள் என்பது தெளிவு. அவள் செய்யவேண்டியது, பூரண சரணாகதிக்கான "செயலை" அனுசரிப்பது மட்டுமே!

"நங்காய்" என்பது அப்பெண்ணின் பெருஞ்சிறப்பைப் பேசுகிறது. எப்படி, உத்தமமும் ஞானமும் மிக்க ஆண்வர்க்கத்தினரை "நம்பி" (பெருமாளே நம்பி தானே!) என்று அழைக்கிறோமோ, அரிய ஞானமும், குணச் செல்வங்களும் பெற்ற மகளிரை "நங்கை" என்று குறிப்பிடுகிறோம். உறங்கும் கோபி அத்தகைய நங்கை என்பதை உணர்க!

மேலும், பிரத்யட்சம், அனுமானம், சப்தம்(சாத்திரம்) என்ற மூன்று பிரமாணங்களும் இப்பாசுரத்தில் சொல்லப்பட்டுள்ளன.

பிரமாணம் என்பதை ஞானத்தின் ஊற்று, ஞானம் பெறப்படும் இடம் அல்லது ஞானத்தைத் தரும் வழிவகைகள்/விஷயங்கள் என்று கொள்ள வேண்டும். பிரமேயம் என்பது பிரமாணத்தால் அறியப்படும் பொருள் என்று அர்த்தம். பிரமாணத்தைக் கடைபிடிப்பவன் பிரமாதா ஆகிறான்.

சப்தப் பிரமாணம் என்பது வேதம் அல்லது ஸ்ருதியைச் சார்ந்தது. வேதத்தை இயற்றியவர் என்று யாரும் கிடையாது. வியாசர் வேதத்தை நான்காக வகுத்து சாரப்படுத்தினார். இதுவே குறைவில்லாத பிரமாணம்.

பிரத்யட்சம் (புலன்களால் உணரப்படும்) மற்றும் அனுமானம் (Inference based onobservation) என்ற 2 பிரமாணங்களும் குறையுடையவையே.

"உங்கள் புழைக்கடை" என்பது அனுமான பிரமாணம்
"தவத்தவர் தங்கள் திருக்கோயில் சங்கிடுவான் போகின்றார்" என்பது பிரத்யட்ச பிரமாணம்
"எங்களை முன்னம் எழுப்புவான் வாய் பேசும் நங்காய்!" என்ற ஆப்த வாக்கியம் (சப்தம்) சாத்திரப் பிரமாணமாம்.

உங்கள் புழைக்கடைத் தோட்டத்து வாவியுள் செங்கழுநீர் வாய் நெகிழ்ந்து - உலகப் பற்றுகளில் உழன்று கொண்டிருக்கும் ஒருவனுக்கு ஞானம் துளிர்க்கத் தொடங்குவது உள்ளர்த்தமாம்

ஆம்பல்வாய் கூம்பினகாண் - காமம், குரோதம் போன்ற அஞ்ஞானம் சார் உணர்வுகள் விலகின

செங்கல்பொடிக்கூறை வெண்பல் தவத்தவர் தங்கள் திருக்கோயில் சங்கிடுவான் போகின்றார் - மிக்க ஞானமுடைய ஆச்சார்யனின் சம்பந்தம் ஏற்படப் போவதை குறிப்பில் உணர்துவதாம்.

எங்களை முன்னம் எழுப்புவான் வாய் பேசும் நங்காய்! எழுந்திராய்! - நாங்கள் சம்சார பந்தம் என்ற நித்திரையிலிருந்து வெளிவர உத்தம் அதிகாரியான நீயே அருள வேண்டும்!

நாணாதாய் - நாணம் என்பது தன்னடகத்தை மட்டும் குறிப்பதாகாது, அது அகங்காரத்தையும் குறிப்பதாம். அதனால், அகங்கார-மமகாரங்கள் அற்றவள் அப்பெண் என்பதால், "நாணாதாய்" என்ற பதம் அவளுக்கு பொருத்தமே!

நாவுடையாய் - சகல சாத்திரங்களையும், வித்தையையும் பேசும் (நல்வாக்கு அருளும் ஹனுமன், உடையவர் போன்ற) சான்றோர் அனைவரும் நாவுடையவரே! அதனால், இதுவும் உறங்கும் பெண்ணின் சிறப்பையே சொல்கிறதாக அன்னங்கராச்சார் சுவாமிகள் கூறுவார்.

சங்கொடு சக்கரம் ஏந்தும் தடக்கையன் பங்கயக் கண்ணானைப் பாடேலோ ரெம்பாவாய் - சங்கும் சக்கரமும் பரமனது பரத்துவத்தை உணர்த்துவதாம். பெருமானை உபாசனை செய்யும் மார்க்கத்தை உபதேசிக்க வேண்டுவது என்பது உள்ளுரை.
**********************************************

இப்பாசுரம், திருப்பாணாழ்வாருக்கான ஆண்டாள் பாடிய திருப்பள்ளியெழுச்சி என்று சொல்வது ஐதீகம். இதற்கான விளக்கத்தைப் பார்ப்போம்.

"நங்காய் நாணாதாய் நாவுடையாய்" என்பது திருப்பாணருக்கு மிகவும் பொருந்தும். மேலே சொன்னபடி, முழுமையான நற்குணங்களும், ஞானமும் கொண்ட திருப்பாணரை "நங்காய்" என்று ஆண்டாள் விளிக்கிறார்! அதனால் தானே, லோகசாரங்க முனியே திருப்பாணரை தன் தோளில் சுமந்தபடி அரங்கனை தரிசிக்க கூட்டிச் சென்றார்!

மேலும், "செங்கல் பொடிக்கூரை வெண்பல் தவத்தவர்" என்பது இங்கு லோக சாரங்க முனியைக் குறிப்பில் உணர்த்துவதாம்!

அப்படி அவரை தோளில் தூக்கிச் சென்றபோதும் கூட தன் பக்தியின் மீது கர்வம் கொள்ளாமல், "அடியார்க்கு என்னை ஆட்படுத்த விமலன்" என்று பாடிய திருப்பாணரை "நாணாதாய்" (அகங்காரமின்மை) என்று கோதை நாச்சியார் போற்றுகிறார்.

சுவாமி தேசிகன் திருப்பாண் பெருமாள் பற்றி, "பாண் பெருமாள் பாடியதோர் பாடல் பத்தும்பழமறையின் பொருளென்று பரவுமிங்கள்" என்று சொல்லியதிலிருந்தே, திருப்பாணாழ்வார் தனது பத்து பாசுரங்கள் (அமலனாதிபிரான்) வாயிலாக வேத சாரத்தையே சொன்ன பெருந்திறன் வாய்த்தவர் என்பது புரிகிறது. ஆண்டாள் அவரை "நாவுடையாய்" என்றழைப்பதில்என்ன ஆச்சரியம் இருக்க முடியும்?

திருப்பாண் பெருமாள் தனது அமலானாதிபிரான் பாசுரங்களில் சங்கு சக்கரமேந்திய பெருமாளின் கோலம் பற்றியும், அரங்கனின் திருக்கண்கள் பற்றியும் பாடியிருப்பதை கவனிக்க வேண்டும்.

"கையினார் சுரிசங்கனல் ஆழியர்" என்றும்
"கரியவாகிப் புடைபரந்து மிளிர்ந்து செவ்வரியோடி நீண்டவ பெரியவாய கண்கள் என்னை பேதைமை செய்தனவே" என்றும் இரு பாசுரங்களில் வருகின்றன.

சூடிக் கொடுத்த நாச்சியார் அதை மனதில் கொண்டு, "சங்கொடு சக்கரம் ஏந்தும் தடக்கையன்பங்கயக் கண்ணானைப் பாட" என்று அதே போன்ற வர்ணனையை கையாள்கிறார் !!!

"எங்களை முன்னம் எழுப்புவான் வாய் பேசும் நங்காய்!" என்பதை திருப்பாணருடன் தொடர்புபடுத்தும்போது ஒரு சுவாரசியமான அர்த்தம் கிடைக்கிறது :)

அதாவது, "அடியார்க்கு என்னை ஆட்படுத்த விமலன்" என்று தன்னை அடியார்க்கு அடியாராக வரிந்து கொண்ட திருப்பாணரையே லோகசாரங்க முனி தான் அரங்கனிடத்துக்கு தன் தோளில் சுமந்து (பாணர் அதை விரும்பாவிட்டாலும், அரங்கனின் கட்டளை அது என்பதால்)சென்றார்! அடியார்க்கு அடியார் எனும்போது திருப்பாணரன்றோ லோகசாரங்கரை தூக்கிச்செல்ல வேண்டும்!

அதனால் தான் என்னவோ, திருப்பாணர் தான் பாடியபடி நடக்கவில்லை என்பதை, "எங்களை முன்னம் எழுப்புவான் வாய் பேசும் நங்காய்!" என்று பாடி, இப்பாசுரத்தில் ஆண்டாள் விளையாட்டாய் சுட்டிக் காட்டுகிறாள்! இங்கு, "எங்களை" என்பது அடியவரையும், "எழுப்புவான்" என்பது "சுமந்து செல்வதையும்", "வாய் பேசும்" என்பது நடக்காத ஒன்றை வாய் வார்த்தையாக சொல்வதையும் குறிப்பில் உணர்த்துகிறது :)

சில குறிப்புகள்:

செங்கழுநீர் = Nymphaea odorata = fragrant (day) water lily. இதில் பல நிறங்கள் (ரோஸ், காவி, மஞ்சள், வயலட்) உண்டு.

அது போல, ஆம்பல் = Nymphaea lotus = white (night) water lily

எ.அ.பாலா

கறுப்புவெள்ளை ஓவியம் நன்றி: தேசிகன்.காம்

494.புள்ளின்வாய் கீண்டானைப் பொல்லா அரக்கனை -TPV13

திருப்பாவை பதிமூன்றாம் பாடல்

ஏமாற்ற நினைப்பதை விடுத்து படுத்துறங்குவதை விட்டு எழுந்து வா!

அடாணா ராகம் , மிச்ரசாபு தாளம்

புள்ளின்வாய் கீண்டானைப் பொல்லா அரக்கனை
கிள்ளிக் களைந்தானைக் கீர்த்திமை பாடிப்போய்
பிள்ளைகளெல்லாரும் பாவைக் களம்புக்கார்
வெள்ளியெழுந்து வியாழமுறங்கிற்று
புள்ளும்சிலம்பினகாண் போதரிக் கண்ணினாய்!
குள்ளக்குளிரக் குடைந்து நீராடாதே
பள்ளிக்கிடத்தியோ பாவாய்! நீ நன்னாளால்
கள்ளம் தவிர்ந்து கலந்தேலோரெம்பாவாய்.

பறவை உருக்கொண்டு வந்த பகாசுரனின் வாயைக்கிழித்துக் கொன்ற கண்ணன் மற்றும், இலங்கேஸ்வரனின் பத்துத்தலைகளையும் கிள்ளியெறிந்து அவனை வதம் செய்த ராமனுடைய புகழைப் போற்றிப்பாடி, ஊரிலுள்ள அனைத்துப் பெண்களும் நோன்பு நோற்க, குறித்த இடத்தில் வந்து சேர்ந்துவிட்டனர். (சுக்கிரன்) சுக்கிரக்கிரகம் உச்சிக்கு வந்து, வியாழன் (குரு கிரகம்) மறைந்து விட்டது. இரையைத் தேடி செல்லும் காலைப்பறவைகளின் இறக்கைகள் உண்டாக்கும் சப்தம் உன் காதுகளில் விழவில்லையா?

வண்டுகள் மொய்க்கும் அழகிய தாமரை மலர் போன்ற கண்களையுடையவளே! உள்ளமும் உடலும் குளிர, எங்களுடன் சேர்ந்து குளிர்ந்த நீரில் அமிழ்ந்து நீராடாமல் இப்படி படுக்கையில் கிடக்கலாமோ, அழகிய பெண்ணே! இந்நன்னாளில் தூங்குவது போல பாவனை செய்வதை விடுத்து, எங்களுடன் கலந்து நோன்புக்கு வருவாயாக!

இப்பாசுரத்தில் துயிலெழுப்பப்படும் பெண், கண்ணனின் திவ்ய தரிசனத்தை ஒரு தடவை பெற்ற பாக்கியசாலி. அது குறித்த திவ்ய சிந்தனையில் மூழ்கியிருப்பதால், உறங்குவது போல தோற்றமளிக்கிறாள் அந்த அழகிய கண்களுக்குச் சொந்தக்காரி. இதை போதரிக்கண்ணினாய் என்ற பிரயோகத்திலிருந்து புரிந்து கொள்ளலாம்! போதரி = போது + அரி = தாமரைமலர் + வண்டு, வண்டு என்பது கருவிழியைக் குறிக்கிறது. அது தெரிவதால், அப்பெண் உறங்கவில்லை என்பது தெளிவு, ஒருவித மோன நிலையில் இருக்கிறாள், கிருஷ்ணானுபவத்தை மனதில் அசை போட்டவாறு !

முந்தைய பாசுரத்தில், ராமபிரானின் கீர்த்தி (சினத்தினால் தென்னிலங்கைக் கோமானைச் செற்ற மனத்துக்கினியானை!) பாடப்பட்டது. இதனால், கல்யாண குணநலத்தில் சிறந்தவன் ராமனா அல்லது கண்ணனா என்று இரண்டு குழுக்களாகப் பிரிந்து கோபியர் வாக்குவாதம் செய்கின்றனர். ராமனும் கண்ணனும் ஸ்ரீமன் நாராயணனே என்று சமரசம் ஏற்படவே, கோதை நாச்சியார் இப்பாசுரத்தில் "(புள்ளின்வாய் கீண்டானைப் பொல்லா அரக்கனை கிள்ளிக் களைந்தானைக் கீர்த்திமை பாடிப்போய்)" என்று இருவரையுமே போற்றிப் பாடி, கபடத் துயிலில் உள்ளவளை எழுப்புகிறாள்.

"புள்ளும் சிலம்பின காண்" என்று கோதையார் ஆறாம் பாசுரத்தில் சொல்லியதை மறுபடியும் இங்கு பாட என்னக் காரணம் ? அப்போது, பறவைகள் துயிலெழுந்து கூவுவதைப் பற்றிச் சொல்கிறார் ஆண்டாள். இப்போது, பறவைகள் கூட்டிலிருந்து புறப்பட்டு இரை தேடும் இடங்களுக்கு பறந்து செல்லும்போது இறக்கைகள் படபடத்து ஏற்படும் சப்தத்தைப் பற்றிப் பாடி, இன்னும் அதிக சமயமாகி விட்டதை உணர்த்துகிறாள் !

"வெள்ளியெழுந்து வியாழமுறங்கிற்று" - ஆண்டாள் இப்பூமியில் வாழ்ந்ததாகக் கணிக்கப்பட்ட காலத்தில் சுக்ரன் (VENUS) ஒரு பக்கம் தோன்ற, வியாழன் (JUPITER) நேரெதிர் பக்கம் மறைந்த ஒரு அரிதான வானவியல் நிகழ்வு நடந்துள்ளதை வானவியல் குறிப்புகள் பறைசாற்றுகின்றன! இத்தனைக்கும், டெலஸ்கோப் கண்டுபிடிக்கப்படாத காலம் அது, ஆண்டாள் ஒரு பதினாலு வயது நிரம்பிய ஒரு பெண்! அவள் ஒரு அதிசய வானவியல் நிகழ்வு குறித்து துல்லியமாக, ஒரு வாக்கியத்தில் எளிதாகக் கூறி விட்டுச் சென்று விட்டாள் !

ஆச்சார்யனிடம் ஞான உபதேசத்திற்குச் செல்லாமல், மற்ற சீடர்களிடமிருந்து விலகியிருக்கும் ஒரு சீடனுக்கு அறிவுரை கூறும் நோக்கில் இப்பாசுரம் அமைந்துள்ளதாக அபினவ தேசிகன் சுவாமிகள் உள்ளுரை கூறுவார். இவன் ஆச்சார்ய உபதேசம் கிடைக்கப்பெற்ற பாக்கியவான்!

கற்றுணர்ந்ததை தங்களுடன் பகிர்ந்து கொள்ளுமாறு (கள்ளம் தவிர்ந்து கலந்தேலோ), அந்தவொரு சீடனை மற்றவர் வேண்டுகின்றனர். ஆச்சார்யனிடத்தில் செல்வதற்கு முன்பாக ஒரு அடிப்படைத் தகுதியைப் பெற வேண்டியே இந்த விண்ணப்பமாம்.

'புள்ளின்வாய் கீண்டானைப் பொல்லா அரக்கனை கிள்ளிக் களைந்தானைக் கீர்த்திமைப் பாடி' என்பது பத்து இந்திரியங்களையும், மனத்தையும் கட்டுப்பாட்டில் வைத்துள்ள ஆச்சார்யனைப் போற்றுகிறது.

'பிள்ளைகளெல்லாரும் பாவைக் களம்புக்கார்' என்பது (ஒருவனைத் தவிர) மற்ற சீடர்களெல்லாம் ஆச்சார்யனை அடைவதற்கு தயாராகி விட்டதை குறிக்கிறது.

"வெள்ளியெழுந்து வியாழமுறங்கிற்று" என்பது ஞானம் புலரும் மற்றும் அஞ்ஞான இருள் விலகும் சுப வேளையை குறிப்பில் உணர்த்துவதாம்.

"குள்ளக்குளிரக் குடைந்து நீராடாதே" என்பது பகவத் அனுபவத்தில் திளைத்து மகிழ முன் வைக்கப்படும் அழைப்பை உள்ளர்த்தமாக கொண்டது.

"பள்ளிக்கிடத்தியோ பாவாய்! நீ நன்னாளால் கள்ளம் தவிர்ந்து கலந்தேலோ ரெம்பாவாய்" எனும்போது, கைவல்யமே போதும் என்று இருக்கும் அந்த ஒற்றைச் சீடனை, ஆச்சார்ய உபதேசத்திற்கு வந்து மோட்ச சித்தியின் உபாயத்தை அறிந்து கொள்ளுமாறு மற்ற சீடர்கள் அழைக்கிறார்கள் என்பது உள்ளுரையாம். ஆச்சார்ய சம்பந்தம் கிடைக்கும் நாள் என்பதால் "நன்னாள்" என்று கொண்டாடப்படுகிறது.

இப்பாசுரம் ஆண்டாள் நாச்சியாருக்கு இளையவரான தொண்டரடிப்பொடி ஆழ்வாரை துயிலெழுப்புகிறது. இவ்வாழ்வார் பெருமாளுக்கு மலர்க் கைங்கர்யம் செய்வதில் மிகுந்த ஆசை கொண்டவர் என்பதால், "போதரிக் கண்ணினாய்" என்ற பதம் இவருக்குப் பொருந்துகிறது !

மற்ற காரணங்களை பின்னர் இப்பதிவில் சேர்த்து விடுகிறேன்.

எ.அ.பாலா

OCT 2005 - தமிழ்மணமும்...

இது ஒரு மீள்பதிவு, 3 வருடங்களுக்கு முன் சொன்னவை எவையும் மாறவில்லை என்பதை நிரூபித்து வரும் தமிழ் வலையுலக வித்தகப் பதிவர்களுக்கு நன்றி, நன்றி, நன்றி !!! எனக்கும் தமிழ்மண நிர்வாகத்திற்கும் ஸ்நானப்ராப்தி கூட கிடையாது என்பது குறிப்பிடத்தக்கது!
*************************************

Saturday, October 22, 2005

தமிழ்மணமும் ...

தமிழ்மணத்திலிருந்து தற்போது நீக்கப்பட்டிருக்கும் வலைப்பதிவுகளை விலக்கியது சரியானதா என்று பலர் தத்தம் கருத்துக்களை முன் வைத்துள்ளனர். சில கருத்துக்களை சக வலைப்பதிவருடன் பகிர்ந்து கொள்ளத் தோன்றியதன் விளைவே இப்பதிவு!

1. ஒருவர் தன் பதிவில் முன் வைக்கும் கருத்துக்களுக்கு, சிலருக்கோ / பலருக்கோ மாற்றுக் கருத்துக்கள் இருக்கும். அவற்றை, நாகரீகமான வகையில், சம்மந்தப்பட்ட பதிவின் பின்னூட்டக் களத்திலோ அல்லது தனிப்பதிவாகவோ இட மற்றவருக்கு நிச்சயம் உரிமை உண்டு. ஆனால், ஒருவரைப் பற்றிய இரங்கல் பதிவையும், அதில் இடப்பட்ட பின்னூட்டங்களையும் பகடி செய்வது சரியான செயலாகத் தோன்றவில்லை. மதி தமிழ்மணத்திற்கு செய்து வரும் சேவை மற்றும் அவரது எழுத்துக்களை முன் வைத்து அவருக்கென்று ஒரு வாசகர் வட்டம் உள்ளது. அதனால் அவரது பதிவுகள் அதிக அளவில் வாசிக்கப்பட்டும், பின்னூட்டங்கள் பெற்றும் வருகின்றன. இதில் பகடி செய்வதற்கு என்ன இருக்கிறது என்று விளங்கவில்லை!

2. சில சமயங்களில், பகடியை மாற்றுக் கருத்துக்களை வெளியிட ஒரு ஆரோக்கியமான வழியாகப் பயன்படுத்துவதில் தவறில்லை. அதைப் பலரும் ரசிக்கவே செய்கின்றனர். அதே நேரத்தில், வலைப்பதிவுக் களத்தை பிறரை பகடி செய்வதற்கு மட்டுமே பயன்படுத்துவது, பல நேரங்களில் காழ்ப்பை வளர்ப்பதற்கு மட்டுமே அடி கோலுவதாய் அமைந்து விடுகிறது.

3. காசி தமிழ்மணச் சேவையின் முதலாண்டு நிறைவின் போது இட்ட பதிவிலேயே மதத்துவேஷம் மற்றும் இன்னபிற விரும்பத்தகாத விடயங்களைத் தாங்கி வரும் பதிவுகளை விலக்கக்கூடிய சாத்தியக் கூறுகள் இருப்பதாகக் கூறியிருந்தார். அந்த நிலைக்குத் தன்னை தள்ள வேண்டாம் என்றும் வேண்டுகோள் விடுத்திருந்தார். அதனால், தொடர்ந்து அவ்வாறே எழுதி வருபவர்கள் தங்கள் பதிவுகள் தமிழ்மணத்திலிருந்து விலக்கப்படக் கூடிய சாத்தியம் இருந்ததை உணர்ந்திருக்க வேண்டும்.

4. பலருக்கு, பணி, குடும்பம் ஆகியவற்றுக்கே நேரம் போதாமல் இருக்கும் சூழலில், தனியொரு மனிதனாக, தமிழ் வலைப்பதிவுகளை ஒருங்கிணைக்க தமிழ்மணத்தை உருவாக்கிய காசியின் சேவை மனப்பாங்கையும், உழைப்பையும் மனதில் கொண்டாவது, இம்மாதிரி பொதுவில் அவருக்கு கசையடிகள் வழங்குவதை தவிர்க்கலாம் என்பது என் தனிப்பட்ட கருத்து! "நாங்கள் என்ன, தமிழ்மணத்தை உருவாக்க பொருளுதவி கேட்டிருந்தால் தந்திருக்க மாட்டோமா?" என்று வினாவெழுப்புவது சற்றும் சரியல்ல! பொருளுதவி கொடுத்தாலும், ஒருவர் அதில் முனைய வேண்டாமா ?

5. தமிழ்மணத்திலிருந்து விலக்கப்பட்ட வலைப்பதிவுகளுக்குச் சொந்தக்காரர்கள், விடயத்தை பொதுவில் வைப்பதற்கு முன், தனிப்பட்ட முறையில் காசியை அணுகி, காரணங்களைக் கேட்டு, சர்ச்சைக்குரிய பதிவுகளை தாமாகவே நீக்க முன் வந்திருந்தால், பிரச்சினையை சுமுகமான முடிவுக்கு எடுத்து வந்திருக்கக் கூடிய சாத்தியம் இருந்ததாகவேத் தோன்றுகிறது. ஒரு விதயத்தை ஊதிப் பெரிதாக்குவது என்பது இங்கு நடைமுறையாகவே இருந்து வருகிறது!

6. இதைத் தணிக்கை என்று எண்ணுவதை விட, சக வலைப்பதிவரின் மனம் புண்படும்படியும், தேவையற்ற சர்ச்சையை வளர்க்கும் வகையிலும் எழுதாமல் இருப்பதன் அவசியத்தை வலியுறுத்துவதாக நினைத்தால், அனைவருக்கும் நல்லது. முக்கியமாக, சின்னவன், இணையக்குசும்பன் பதிவுகள் நீக்கப்பட வேண்டிய சூழல் உருவானது குறித்து இங்கே யாருக்கும் மகிழ்ச்சி இல்லை!!! பதிவுகள் விலக்கப்பட வேண்டிய காரணங்களை ஆராயும் வழிவகைகள் குறித்து என் கருத்துக்களை முன் வைப்பதை, தற்போதைய சூழலில், தவிர்க்கிறேன்!

7. இறுதியாக, தமிழ்மணம் வாயிலாகத் தான், பல சாதாரணர்களின் (என்னையும் சேர்த்து) பதிவுகள் கவனிக்கப் படுகின்றன, வாசிக்கப் படுகின்றன என்பதை பலரும் ஒப்புக் கொள்வர். ஏன், தமிழ்மணம் மூலமாகத் தான் கௌசல்யா என்ற ஏழை மாணவியின் கல்விக்கு (சக வலைப்பதிவரின் ஆதரவோடு) உதவ வேண்டும் என்ற எங்கள் நோக்கத்தின் முதல் கட்டம் நிறைவேறியது!

என்றென்றும் அன்புடன்
பாலா

பதிவர் enRenRum-anbudan.BALA பதிந்த நேரம் 10/22/2005 04:04:00 PM
*********************************

இவ்விடுகைக்கு வந்த மறுமொழிகள்:

12 மறுமொழிகள்:

Dharumi said...
ஊதுற சங்கை ஊதுவோம்; காது இருப்பவன் கேட்கட்டும்.

4:30 PM, October 22, 2005

Anonymous said...
தங்களுடைய வலைப்பூ தினமலரில் இடம்பெற்றிருந்ததை பார்த்தீர்களா... அம்மு.

7:35 PM, October 22, 2005

enRenRum-anbudan.BALA said...
dharumi,
nanRi !

Anony,
Thanks! Pl. give the link in DINAMALAR that points to my BLOG.

9:46 PM, October 22, 2005

வலைஞன் said...
நன்றி

2:50 PM, October 23, 2005

மூர்த்தி said...
அன்பின் பாலா,

உங்கள் கருத்துகளோடு நான் ரொம்பவும் ஒத்துப் போகிறேன். ஆனால் நீக்குவதற்கு முன் அவர்களுக்கு ஒரு எச்சரிக்கை விடுத்து இருக்கலாம். இது பலர் தாமாகவே திருந்திக் கொள்ள ஒரு வாய்ப்பினை வழங்கி இருக்கும் என்று நினைக்கிறேன்.

3:09 PM, October 24, 2005

ஜோ / Joe said...
பாலா,
உங்கள் கருத்துக்கள் நியாயமானவை.ஆதரிக்கிறேன்.

3:55 PM, October 24, 2005

enRenRum-anbudan.BALA said...
anurag, மூர்த்தி, ஜோ,

நன்றி !

12:49 PM, November 04, 2005

Kasi Arumugam - காசி said...
நன்றி, பாலா.

4:02 PM, December 06, 2007

லக்கிலுக் said...
This post has been removed by a blog administrator.
5:29 PM, December 06, 2007

Rajesh said...
காசி!
தெரியாமல் தான் கேட்கிறேன். 2005 அக்டோபரில் போடப்பட்ட பதிவுக்கு இப்போது ஏன் நன்றி? ...... Edited .......
(Rajesh)

8:29 PM, December 06, 2007

enRenRum-anbudan.BALA said...
ராஜேஷ்,

காசியை நீங்கள் கேள்வி கேளுங்கள், தப்பில்லை. அதே நேரம், சர்ச்சைக்குரிய (தனி மனித தாக்குதலாக இல்லாதபோதும்!) ஒரு வரியை நீக்கியதற்கு மன்னிக்கவும் !

எ.அ.பாலா

8:30 PM, December 06, 2007

Kasi Arumugam - காசி said...
//தெரியாமல் தான் கேட்கிறேன்.//
தெரியாட்டித்தான் கேக்கணும். தெரிஞ்சுட்டே கேட்டா அதுக்குப்பேர் வேற :-)

//இப்போது ஏன் நன்றி?//
அப்ப சொல்லலைன்னா எப்பவும் சொல்லக்கூடாதா? இப்ப சொன்னா என்ன தப்பு? இதையெல்லாம் ஒரு கேள்வின்னு கேக்கவந்துட்டீங்களே, பெரீவரே.

8:49 PM, December 06, 2007

488. இந்திய அம்மாவா சும்மாவா?

குமாரை பார்க்க ஊரிலிருந்து அவனது அம்மா வந்திருந்தார். குமாரின் ரூம்மேட் ஒரு பெண், பெயர் ரம்யா.

ரம்யாவின் கைவண்ணத்தில் அம்மாவுக்கு இரவு விருந்து தயாரானது. சாப்பிடும்போது, குமாரின் அம்மா, 'இந்த ரம்யா இவ்வளவு அழகாக இருக்கிறாளே, குமாருக்கும் இவளுக்கும் இடையே ரூம்மேட் தாண்டிய உறவு இருக்குமோ?' என்று எண்ணினாள். இந்த சந்தேகம் அவளுக்கு கொஞ்ச காலமாகவே இருந்து வந்தது. இப்போது, குமார்-ரம்யா இடையே ஆன நெருக்கமும் அவர்களது நடவடிக்கைகளும், அம்மாவின் சந்தேகத்தை அதிகப்படுத்தின!

அம்மாவின் எண்ண ஓட்டத்தை புரிந்து கொண்ட குமார், "அம்மா, நீங்கள் நினைப்பது போல இல்லை, நானும் ரம்யாவும் வெறும் ரூம்மேட்ஸ் தான்" என்றான்!

அம்மா ஊருக்குச் சென்று ஒரு வாரம் கழித்து, ரம்யா குமாரிடம், "உங்கள் அம்மாவுக்கு விருந்தளித்த நாளிலிருந்து, வீட்டில் இருந்த எனது வெள்ளித் தட்டைக் காணவில்லை. உங்கம்மா எடுத்துக் கொண்டு போயிருப்பார்கள் என்று நீங்கள் நினைக்கவில்லை தானே?!?" என்று கேட்டாள். குமார்,"இருக்காது, எதற்கும் அம்மாவுக்கு ஒரு கடிதம் எழுதி விசாரிக்கிறேன்!" என்றான்.

குமார் சாமர்த்தியமாக எழுதுவதாக நினைத்துக் கொண்டு இப்படி எழுதினான்:
அன்பான அம்மா,
நலம் நலமறிய ஆவல். நீங்கள் இந்த வீட்டிலிருந்து ஒரு வெள்ளித்தட்டை எடுத்துச் சென்றீர்கள் என்று சொல்ல வரவில்லை. அது போல, நீங்கள் அதை எடுத்துச் செல்லவில்லை என்றும் என்னால் கூற முடியவில்லை. விஷயம் என்னவென்றால், நீங்கள் இங்கு விருந்து சாப்பிட்டுச் சென்றதிலிருந்து அந்தத் தட்டைக் காணவில்லை!
--- குமார்

ஒரு பத்து நாட்கள் கழிந்தபின், அம்மாவிடமிருந்து பதில் கடிதம் வந்தது:
அன்புள்ள குமார்,
நலம் நலமறிய ஆவல். நீயும் ரம்யாவும் ஒரே படுக்கையில் உறங்குவதாக நான் சொல்ல வரவில்லை, அதே நேரம், நீயும் அவளும் ஒரே படுக்கையில் உறங்குவதில்லை என்றும் என்னால் கூற முடியவில்லை!

விஷயம் என்னவென்றால், ரம்யா அவளது படுக்கையில் உறங்குபவளாக இருந்தால், இந்நேரம் அந்த வெள்ளித் தட்டை கண்டு பிடித்திருப்பாள், அவளது படுக்கையில் தலையணைக்கு அடியில் !?!?

இப்படிக்கு
அன்புள்ள அம்மா

கதையின் நீதி:
அம்மாவிடம் பொய்மை கூடாது, அதுவும் இந்திய அம்மாவிடம் கூடவே கூடாது :-)

எ.அ.பாலா

487. மும்பையில் ரத்தம் காயாத நிலையில் சென்னையில் கிரிக்கெட் மேட்ச் தேவையா?

நேற்றிரவு NSG கமாண்டோக்களுக்கு ரூ.15000 தான் சம்பளம் என்பதையும், மும்பை தாக்குதலின்போது அவர்களை விமான நிலையத்திலிருந்து அழைத்து வருவதற்கும், வெற்றிகரமான ஆபரேஷனுக்குப் பிறகு அவர்களை கூட்டிச் செல்வதற்கும் மாநகரப் பேருந்துகள் பயன்படுத்தப்பட்டன என்பதையும் ஒரு செய்தியில் வாசித்தபோது, நிஜமாகவே சம்ம கடுப்பாக இருந்தது.

அதோடு, இந்த சூழ்நிலையில் சேப்பாக்கத்தில் ஒரு கிரிக்கெட் மேட்ச்சை, 300 கமாண்டாக்கோள் மற்றும் 5000 போலீசாரின் துணையோடு (இந்த பாதுகாப்புக்கான செலவை BCCI ஏற்குமா அல்லது மக்கள் வரிப்பணத்திலிருந்தா?)நடத்தி என்ன சாதிக்க நினைக்கிறோம் என்ற கடுப்பும் சேர்ந்து கொள்ள ஒரு காட்டமான பதிவு போட்டுத் தாக்கலாம் என்று நினைத்து, நேரமின்மையால் கை விட்டேன் !!! நல்லவேளை எழுதாமல் விட்டது நல்லதுக்குத் தான், இல்லாவிட்டால், இன்று ஒரு FAMOUS இந்திய வெற்றியைப் பற்றி எழுத முடியாமல் போயிருக்கும்! என்ன புரிகிறதா ? "என்னடா இவன், நேற்று கிரிக்கெட் மேட்ச் எதற்கு என்று பதிவு போட்டவன், இன்று இந்திய வெற்றியை சிலாகித்து இன்னொரு பதிவு போட்டிருக்கிறான்" என்று பதிவுலக நண்பர்கள் என்னை துவைத்து காயப் போட்டிருப்பார்கள் இல்லையா ?? ;-)

சரி, மேட்டருக்கு வருகிறேன். ஞாயிறன்று சேவாகின் விளாசலை பார்த்தபோதே திங்கள் ஆபிசுக்கு "சுட்டி" அடிக்க முடிவு செய்து விட்டேன்! அதை Working from Home என்றும் சொல்வதுண்டு :) 68 பந்துகளில் சேவாக் அடித்த 83 ரன்கள் தான் இந்த வெற்றிக்கு அடித்தளம் அமைத்தது என்பதை யாரும் மறுக்க முடியாது. அன்றைய ஆட்ட முடிவில் ஸ்கோர் 131-1 என்ற அளவில் இருந்ததால் தான் நம்மால் முடியும் என்ற நம்பிக்கை மற்ற மட்டைக்காரர்களுக்கு ஏற்பட்டது !!! சேவாக்கை பற்றி சைமன் ஹியூஸ் (daily telegraph) கூறியிருப்பதை இங்கே நினைவு கூர்கிறேன்.
To most batsmen an 85 mph cricket ball equals threat. To Sehwag it spells opportunity!!!

32 ஆண்டுகளுக்கு முன் 1976-இல் மேற்கிந்திய அணிக்கு எதிரான (port of spain) டெஸ்ட் ஆட்டத்தில், இந்தியா 403 என்ற வெற்றி இலக்கை 'துரத்தியபோது', நான்காம் நாள் முடிவில் நமது ஸ்கோர் 134-1. அந்த ஆட்டத்தில் நாம் வெற்றி பெற்றோம், இந்த சேப்பாக்க ஆட்டத்தில் சேவாக் புண்ணியத்தில் 131-1, வரலாறு திரும்பும் என்று எண்ணுவதற்கு இந்த ஒரு காரணம் (எனக்கு!!) போதாதா என்ன ???

இறுதி நாள் டிராவிட்டும், லஷ்மணும் அவுட்டாகி பெவிலியனுக்கு திரும்பியபோது, சச்சின் நிதானமாக ஆடிக் கொண்டிருந்தாலும், வெற்றி அவ்வளவு எளிதில்லை என்று தான் நினைத்தேன். யுவராஜ் களத்தில் நுழைந்தவுடன், அப்போது திறமையாக பந்து வீசிக் கொண்டிருந்த பிளின்டாஃப், ஒவ்வொரு பந்தை வீசி முடித்தவுடன் யுவராஜை முறைத்தார், பேச முயற்சித்தார். அவரை வம்புக்கு இழுத்து அவரது concentration-ஐ கலைத்து அவுட்டாக்க (பிரம்ம) பிரயத்தனப்பட்டார். ஆனால், யுவராஜோ அவரை துளிக்கூட லட்சியம் செய்யாமல் அவருக்கு தன் முதுகைக் காட்டியது நல்ல சுவாரசியம் :) ஆஸ்திரேலியர்களின் sledging போல் அல்லாமல் இது ஒரு Friendly Banter அளவிலேயே இருந்தது! இது போன்ற சங்கதிகள் தான் டெஸ்ட் கிரிக்கெட்டின் மெருகை கூட்டுகின்றன.

இந்த நிலையில் 163 ரன்கள் வேண்டியிருந்தன. சச்சினின் சகவாசத்தில், யுவராஜ் மலர்ந்தார் (அதாங்க, Yuvaraj blossomed in the company of Sachin:) ). தொய்வில்லாமல், இருவரும் ரன்களை குவித்தனர். இருவருக்கும் 100 ரன்கள் பார்ட்னர்ஷிப் என்ற நிலையில், நம்பிக்கை துளிர்விட்டது. சச்சினின் முகத்தில் நிலவிய அமைதியையும் நம்பிக்கையையும் பார்த்தபோது, 1999-ல் பாகிஸ்தானுக்கு எதிராக 14 ரன்களில் இந்தியா வீழ்ந்தது போல இம்முறை நடக்காது என்று தான் தோன்றியது. ஷார்ஜாவில் மியதாத் அடித்த கடைசி பந்து சிக்ஸரும், சேப்பாக்க பாக் தோல்வியும் என் வாழ்நாள் உள்ளவரை உறுத்திக் கொண்டே தான் இருக்கும் !!!

வெற்றிக்கு 40 ரன்கள் என்ற நிலையில், யுவராஜ் கொஞ்சம் தடாலடியாக ஆட முயற்சித்தார்। நல்லவேளை அவுட்டாகவில்லை। சச்சின் ஓடி வந்து, 1999-ஐ ஞாபகப்படுத்தி, ரிஸ்க் எடுக்கக் கூடாது என்று அறிவுறுத்தினார்। (இதை சச்சினே ஆட்டம் முடிந்தவுடன் கூறினார்!). 88-ல் இருந்த சச்சின் பனேசரின் பந்து வீச்சில் தொடர் பவுண்டரிகள் அடித்து 96க்கு சென்றார்! அப்புறம் 2 ரன்கள், 1 ரன், இப்போது 99 ரன்கள், இந்திய வெற்றிக்கு 4 ரன்கள் தேவை! அந்த ஓவரில் மிச்சமிருந்த 5 பந்துகளையும், யுவராஜ் ரன் எடுக்காமல், defend செய்தபோது, அவரது பெருந்தன்மைக்கு சேப்பாக்க ரசிகர்களிடையே பலத்த கைதட்டல் :)

அடுத்த ஓவரின் 3வது பந்தை, தனக்கு பிடித்தமான paddle sweep வாயிலாக சச்சின் பவுண்டரிக்கு அனுப்பியதில், சச்சினின் 41வது சதமும், ஒரு வரலாற்று சிறப்பு மிக்க வெற்றியும் ஒரு சேர அமைந்தன !!! சச்சினை நினைத்து என் கண்கள் பனித்தன! (இது உண்மையாகவே...நீங்க 'வேற டைப் "கண்கள் பனித்தது" பத்தி நினைச்சா அதுக்கு நான் பொறுப்பில்ல ;-) )

And atlast, the ghosts of Chepauk-1999 (and Barbados-1997) were exorcised forever!

இந்தியா வெற்றி இலக்கை அடைந்தவுடன், களத்திற்கு முதலில் ஓடிவந்து சச்சினுடன் கை குலுக்கியது ஒரு groundswoman. அப்பெண்மணியின் வெட்கம் கலந்த சந்தோஷத்தில் பூரித்த முகம் என் ஞாபகததில் வெகு காலம் நிலைத்திருக்கும் !!! கிரிக்கெட் நம்மூரில் ஏன் இத்தனை பிரபலமாக (cricket is a religion என்ற அளவுக்கு) இருக்கிறது என்பதற்கு அந்தப் பெண்மணியை விட சிறந்த உதாரணத்தை காட்ட இயலாது...

மும்பை தாக்குதலின்போது தீவிரவாதிகளை எதிர்த்துப் போராடி உயிர் நீத்த NSG வீரர்கள்/காவலதிகாரிகள் மற்றும் தீயணைப்படை வீரர்கள் குடும்பங்களுக்கு BCCI 2 கோடி ரூபாய் வழங்கியது பாராட்டுக்குரியது.

சச்சின் கூறிய 2 வரிகள் தான், என்னளவில், அவரது சதத்தை விட உயர்ந்தவை.
I dont think any century like this one will be able to compensate the loss people have suffered in the Mumbai attack. Nothing can match their grief but as cricketers this is what we can do to help.
சச்சினின் கிரிக்கெட் திறனுக்கு சற்றும் குறையாதவை அவரது தன்னடக்கமும், எளிமையும், அமைதியும்!!!

எ.அ.பாலா

பி.கு: தமிழ்மணம் சூடான இடுகைகளில் இடம் பெறுவதற்காகவே திட்டம் தீட்டி இப்பதிவின் தலைப்பு வைக்கப்பட்டது :-)

பிற்சேர்க்கை: இம்மாதிரி தலைப்பு வைத்தது சிலபல வாசக நண்பர்களுக்கு எரிச்சலை ஏற்படுத்தியிருக்கிறது என்று தெரிகிறது, தமாஷுக்காக செய்தது, 'கெட்ட' நோக்கம் எதுவுமில்லை, மன்னிக்கவும் ! இதற்காக (-) அமுக்கி உங்கள் எதிர்ப்பை தெரிவிக்க வேண்டாமே, ப்ளீஸ் :-)

486. தீவிரவாதம் சார்ந்த கேள்விகள் - டைம்ஸ் நாளிதழின் மக்கள் சர்வே

பாகிஸ்தான் அரசு மும்பைத் தாக்குதலுக்கு ஆதரவு அளித்ததா என்ற கேள்விக்கு, டைம்ஸ் சர்வேயில் 88% மக்கள் ஆம் என்று பதில் சொல்லியிருக்கிறார்கள் என்பது குறிப்பிடத்தக்கது!

மற்ற சில கேள்விகளும், சர்வே முடிவுகளும்: ஒரு பார்வை

1. உள்நாட்டு பாதுகாப்பை ராணுவம் அல்லது ஒரு ஃபெடரல் அமைப்பு ஏற்க வேண்டுமா ?

ஆம் - 77 %

இல்லை - 18%

2. பாகிஸ்தானுடன் அனைத்து வகை உறவுகளையும் இந்தியா முறித்துக் கொள்ள வேண்டுமா ?

ஆம் - 73% (அதாவது கிட்டத்தட்ட நான்கில் மூன்று பங்கு பேர், இதே கருத்தை எனது சமீபத்திய பதிவு ஒன்றில் சொல்லியிருந்தேன்!)

இல்லை - 25%

3. இந்தியாவின் மற்ற இடங்களின் அமைதிக்காக காஷ்மீரத்தை தாரை வார்க்க வேண்டுமா ?

இல்லை - 76% (காஷ்மீர் இந்தியா வசம் இருக்கத் தான் வேண்டும் என்பதில் மக்கள் உறுதியாக உள்ளார்கள்!)

ஆம் - 24%

4. வளர்ந்த நாடுகளின் (இஸ்லாமிய நாடுகளை நோக்கிய) தவறான கொள்கைகளின் விளைவால் இந்தியாவில் தீவிரவாதம் பெருகியதா ?

ஆம் - 61%

இல்லை - 35%

5. பாகிஸ்தானிலும், பங்களாதேஷிலும் அமைந்துள்ள தீவிரவாத முகாம்களை இந்தியா அழிக்க வேண்டுமா ?

ஆம் - 69% (இப்படி அழிப்பதால், பெரிய அளவில் போர் மூண்டு விடும், பாகிஸ்தான் நம் மீது அணுகுண்டு வீசி விடும் என்று பெருவாரியான மக்கள் நம்பவில்லை, அஞ்சவும் இல்லை என்பது கவனிக்க வேண்டியது!)

இல்லை - 26% (இவர்கள் சற்று பயந்தவர்கள் :-) )

மேலே விடுபட்ட கேள்விகளுக்கான சர்வே முடிவுகளை (நகர வாரியாகவும் சதவிகிதம் தரப்பட்டுள்ளது) கீழே உள்ள படங்களில் காணலாம்.



நன்றி: டைம்ஸ் ஆஃப் இண்டியா
.

485. மும்பை பயங்கரம் பாகிஸ்தான் நடத்திய வெள்ளோட்டம்

மும்பைத் தாக்குதலின் பின்னணியில் இப்படி ஒரு திட்டம் இருக்கலாம். நான் propose செய்யும் தியரி இது! வாசியுங்கள்!

மும்பையில் நடந்த தீவிரவாதத் தாக்குதல் ஒரு வெள்ளோட்டம் / பரிசோதனை முயற்சி. பாகிஸ்தான் அரசு, ராணுவம், ஐ.எஸ்.ஐ திட்டமிட்டு நடத்திய ஒரு பரிசோதனை முயற்சி.

இந்தியாவுக்கும் பாகிஸ்தானுக்கும் நேரடியான போர் என்று வந்தால் பாகிஸ்தான் தோற்கும் என்பது பாகிஸ்தானின் ராணுவ திட்டமிடுபவர்களுக்கு நன்றாக தெரிந்த விஷயம். இந்திய ராணுவத்தின் ஏராளமான போர்வீரர்கள் உள்ளே புகுந்தால் பாகிஸ்தான் காலி.

ஆனால், பாகிஸ்தான் கமோண்டோ குழுக்களை உருவாக்கி அவற்றை இந்தியாவின் பல நகர்களெங்கும் அனுப்பி இந்தியாவையே ஸ்தம்பிக்க வைக்கலாமா என்று அறியும் முயற்சி இது.

இது வேண்டுமென்றே பாகிஸ்தானிய கமோண்டோக்கள் எல்லோரையும் பலிகொடுப்பதாக வரையப்பட்டிருந்தாலும், எதிர்காலத்தில் முக்கிய இடங்களை ஆக்கிரமித்து தொடர்ந்து அந்த இடங்களை கைப்பற்றி வைத்திருக்கவும், அதன் மூலம் மிரட்டவும் இயலும்.

இந்தியா போர் என்று வந்தால், ஏராளமான கமோண்டோக்கள் இந்தியாவுக்குள் வருவார்கள். சென்னை மும்பை கல்கத்தா டெல்லி ஆகியவற்றின் முக்கிய இடங்களை இதுபோல கைப்பற்றுவார்கள். பாராளுமன்றம் தாக்கப்படும்.

இதுதான் அந்த பரிசோதனை முயற்சி என்றால், பாகிஸ்தானின் திட்டம் வெற்றி என்றே கொள்ளலாம். மூலைக்கு மூலை இந்தியாவில் கமோண்டோக்களை நிறுத்த முடியாது.

10 பேர்கள் செய்தவற்றை தடுக்க, நிறுத்த 3 நாட்களுக்கு மேல் ஆனது. இந்த பத்து பேர்களும் நான்கு இடங்களில் இருந்துள்ளர்கள். அங்கங்கு வெடிகுண்டுகள். ரயில் நிலையத்தில் சரமாரியாக சுடுவது. தாஜ் ஹோட்டல் ஆக்கிரமிப்பு (இது எதிர்காலத்தில் ஆல் இந்தியா ரேடியோ அல்லது வேறொரு முக்கிய அரசாங்க இடமாக இருக்கலாம். சட்டசபை வளாகம், போலீஸ் கமாண்ட் செண்டர் ஆகியவை). ஒவ்வொரு இடத்திலும் 2 அல்லது மூன்று பேரே இருந்திருக்கிறார்கள். அவர்களால் நூற்றுக்கணக்கான என்.எஸ்.ஜி கமோண்டோக்களை மூன்று நாள் தாக்குபிடிக்க முடிந்திருக்கிறது.

இதற்கு பதில்களும் பாகிஸ்தான் அரசாங்கத்தில் ஏற்கெனவே எழுதப்பட்டவை போலத்தான் தோன்றுகிறது. இந்த இடத்தில் வழக்கம்போல அனுதாபமும், non state actors என்ற பல்லவியும் ஆரம்பிக்கப்பட்டுள்ளது. அமெரிக்காவின் அனுதாபத்துடன் போர் சூழ்நிலையை தவிர்க்க உடனே பாகிஸ்தான் தயார் நிலையில் உள்ள அதிகாரிகளை அனுப்ப ஆரம்பித்து விட்டது. இதுதான் பாகிஸ்தானின் திட்டம் என்றால், இந்தியா மிகவும் சிக்கலில் உள்ளது என்பது வெளிப்படை.

இஸ்ரேல் தன்னை விட பெரிய அரபு நாடுகளை வெற்றி கொண்டது போல பாகிஸ்தான் இந்தியாவை வெற்றி கொண்டதும் வரலாற்றில் எழுதப்பட சாத்தியம் உள்ளது.

484. எவ்ளோ அடிச்சாலும் தாங்குறாங்க. இந்தியா ரொம்ம்ம்பபபப நல்ல நாடுப்பா !!!

தினமலர் நாளிதழில் வந்த வாசகர் ஒருவரின் கருத்து இது. சிரிப்பாக இருந்தாலும் சிந்திக்க கூடிய ஒரு விசயத்தை இதன் மூலம் சொல்லி இருக்கிறார். பாருங்கள். மெயிலில் இதை என் கவனத்திற்கு கொண்டு வந்த நண்பர் கவிஞர் பிரபுவுக்கு நன்றி :) .
********************************
இந்த பதிவு யாரையோ கிண்டல் செய்ய வேண்டும், நக்கல் செய்ய வேண்டும் என்ற எண்ணத்தில் நையாண்டி நோக்கில் எழுதப்படவில்லை. நடப்பதை கண்டு வலியிலும், கோபத்திலும் எழுதியது.

தீவிரவாதி 1: நாம பனிரெண்டு பேர அனுப்பி, இருநூறு மக்களை கொன்னுருக்கோம். ஆனா இந்திய அரசு, தீவிரவாதிகளுடனான போரில் வெற்றி, சதி முறியடிப்பு பேசிக்கிறாங்களே?

தீவிரவாதி 2: அதான் எனக்கும் புரியல. டிபன் பாக்ஸ்ல குண்டு வச்சோம். ஒரு மாசத்துல மறந்திட்டாங்க. சைக்கிள்ள குண்டு வச்சோம். ரெண்டு மாசத்துல மறந்திட்டாங்க. என்ன பண்ணினாலும் அதிகபட்சம் மூணு மாசத்துல மறந்திடுறாங்க.

தீவிரவாதி 1: அதனால தான் இந்த தடவை, ஏழை, நடுத்தர மக்களை விட்டுட்டு, இந்திய அரசு அக்கறை எடுத்துக்கிற மேல்தட்டு மக்களை தாக்குனோம்.

தீவிரவாதி 2: அதுக்கும் எந்த விதமான பிரயோஜனம் இருக்குற மாதிரி இல்ல. நாம நடத்தின தாக்குதல வச்சி அரசியல்வாதிங்க இப்பவே அவனுங்களுக்காக ஒட்டு பொறுக்க ஆரம்பிச்சிட்டாங்க.

தீவிரவாதி 1: எனக்கென்னமோ, ஒரு நல்ல விஷயம் நடக்குற மாதிரி இருக்குது.

தீவிரவாதி 2: என்ன?

தீவிரவாதி 1: ஏதோ, தகவல் பரிமாறிக்கணும்'ன்னு நம்ம பாகிஸ்தான் ஐ.எஸ்.ஐ. தலைவர கூப்பிட்டு இருக்காங்க. போயிட்டு வந்ததும், அவர்கிட்ட என்ன ஏதுன்னு ட்டுட்டு அடுத்த முறை அதுக்கு ஏத்த மாதிரி பிளான் பண்ணனும். மாட்டிக்க கூடாது.

தீவிரவாதி 2: மாட்டினாலும் பிரச்சனை இல்லை. ஏன்னு சொல்லு?

தீவிரவாதி 1 (யோசித்துவிட்டு): கருணை மனு போட்டுட்டு வெளிய வந்திடலாம். அதானே? சரியா?

தீவிரவாதி 2: ஆமாம். ஆமாம். அதே மாதிரி, அடுத்த முறை இந்தியாவுல கொஞ்சம் ஆளுங்கள நமக்காக ஏற்பாடு பண்ணினா போதும்.

தீவிரவாதி 1: ஏன்?

தீவிரவாதி 2: நமக்காக வேல பார்க்க, நிறைய டிவி சானல்கள் இருக்காங்க. நம்மளோட சாட்டிலைட் போன் மூலமா, பேச மட்டும்தான் முடியுது. ஆனா, அவுங்க நமக்காக லைவ் டெலிகாஸ்ட்'யே பண்றாங்க. அது மட்டும் இல்லாம, கமாண்டர்ஸ் கிட்ட பேசி என்ன பிளான்னு கேட்டும் சொல்றாங்க. ரொம்ப யூஸ்புல்லா இருக்கு.

தீவிரவாதி 1: கரெக்ட். அடுத்து எங்க டார்கெட் பண்ணலாம்? சவுத் இந்தியாவுல பண்ணிரலாமா? சென்னை எப்படி?

தீவிரவாதி 2: அங்க வேண்டாம்.

தீவிரவாதி 1: ஏன்?

தீவிரவாதி 2: நாம கஷ்டப்பட்டு குண்டு வைப்போம். ஆனா அங்க இருக்குற அரசியல்வாதிகள் குண்டு வச்சது யாருன்னு அவுங்களுக்குள்ள அடிச்சிக்குவாங்க. ஆளுங்கட்சி, எதிர்கட்சியை சொல்லுவாங்க. எதிர்க்கட்சி, ஆளுங்கட்சியை சொல்லுவாங்க. கடைசில நம்மள மறந்திடுவாங்க.

தீவிரவாதி 1: ஒ!

தீவிரவாதி 2: அதுமட்டும் இல்ல. டிவிக்காரங்களும், இந்த அளவுக்கு உதவுவாங்கன்னு சொல்ல முடியாது. அவுங்கவுங்க கட்சிகாரங்களையும், சினிமாகாரங்களையும் பேட்டி கண்டுட்டு இருப்பாங்க.

தீவிரவாதி 1: இப்பதான் ஒரு தாக்குதல் பண்ணிருக்கோம். அதுக்குள்ளே இன்னொன்னு பண்ண முடியுமா? முன்னெச்சரிக்கை நடவடிக்கைகள் பல எடுத்திருப்பாங்களே?

தீவிரவாதி 2: கடல் வழியா வந்தோம்னு எல்லா துறைமுகத்திலையும் பாதுகாப்பு அதிகரிச்சிருக்காங்களாம். ஹோட்டல்'ல தாக்குதல் பண்ணிருக்கோம்னு எல்லா ஹோட்டல்'லையும் பாதுகாப்ப அதிகரிக்க சொல்லி இருக்காங்களாம். இவனுங்க எப்பவும் இப்படித்தான். கோவில அடிச்சா கோவிலுக்கு பாதுகாப்பு. மார்க்கெட்ட அடிச்சா மார்க்கெட்டுக்கு பாதுகாப்பு. தியேட்டர அடிச்சா தியேட்டர்களுக்கு பாதுகாப்பு. நாம என்ன அடிச்ச எடத்தையா இருப்பி அடிப்போம்?

தீவிரவாதி 1: அதானே? ஆனாலும் எனக்கு வர வர வன்முறை மேல நம்பிக்கையே போயிடுச்சி.

தீவிரவாதி 2: ஏன்?

தீவிரவாதி 1: எவ்ளோ அடிச்சாலும் தாங்குறாங்க.இந்தியா ரொம்ம்ம்பபபப நல்ல நாடுப்பா...

அவனுங்களே வெறுத்து சோர்ந்து தீவிரவாதத்தை விட்டாதான் உண்டு.
************************

நன்றி: தினமலர்

483. ரியல் எஸ்டேட் பகற்கொள்ளை ஒய்ந்து வருகிறது!

மாதச் சம்பளக்காரர்கள் இருக்கிறார்கள், அரசு ஊழியர்கள் இருக்கிறார்கள், அவர்களும் இந்த நாட்டு மனிதர்கள்தான் என்று இப்போதுதான் இந்த ரீ(ய)ல் எஸ்டேட் நிறுவனங்களுக்குத் தெரிய வந்திருக்கிறதாம். அவர்களுக்குத் தேவையான பட்ஜெட் வீடுகளை ரூ. 20 லட்சத்துக்குள் கட்டிக்கொடுத்து லாபம் பார்க்க முடியுமா என்று யோசிக்கிறார்களாம். என்ன ஒரு ஹிப்பக்கிரசி!

மத்தியமர்களை ஃப்ளாட், வீடு என்றாலே காத தூரம் ஓட வைத்த புண்ணியவான்களுக்கு இப்போது கும்பி காயும்போது, ஞானம் பிறக்கிறது போலிருக்கிறது.மேலும் அரசுத் துறைகள் நகரங்களுக்குள் பல நல்ல இடங்களை வீணாகப் பிடித்து வைத்துக்கொண்டிருக்கிறன என்று இந்த ரியல் எஸ்டேட் பகற்கொள்ளைக் கூட்டத்திடமிருந்து குற்றச்சாட்டு வேறு! ஏற்கனவே இவர்களெல்லாம் ஒவ்வொரு ஏரியையும் துர்த்து, புறம்போக்கு நிலங்களை எல்லாம் அபகரித்து, பூங்காக்களை எல்லாம் இடித்து நிரவி, கொள்ளை அடித்தது போதாதா?

குடியிருக்க வீடு என்பது ஓர் அடிப்படைத் தேவை, சந்தேகமில்லை. ஆனால், திடீரென்று அது தான் ஒரே தேவை என்பதுபோல் ஓவர் பில்டப் கொடுத்து, அந்தத்துறை விழுந்தால், பொருளாதாரமே காலி என்று இந்தியாவில் பேசுவது மிகவும் பைத்தியக்காரத்தனம். ரியல் எஸ்டேட் நிறுவனங்கள், தேவையில்லாமல் மத்திய அரசின் மேல் அழுத்தம் கொடுக்கிறார்கள். அரசை ஏன் கேட்கறீர்கள்? நீங்கள் கொள்ளை அடிக்க இடம் பிடிக்க அலைந்தீர்கள்! உங்களால்,

எந்த மத்தியமர் அல்லது சாதாரண மாதச்சம்பளக்காரன் பயன் அடைந்தான்? இன்றைக்கு கும்பி காய்கிறது என்றால் அதையும் அனுபவியுங்கள். ஏற்கனவே திண்டாடிக்கொண்டிருக்கும் அரசை எதற்கு இன்னும் டார்ச்சர் செய்கிறார்களோ?

வங்கிகளின் வீட்டுக்கடனுக்கான வட்டியை குறைக்க வேண்டுமாம். மக்கள் லோன் போட்டு இவர்களிடம் (ஊருக்கு பல மைல் அப்பால்) ஃபிளாட் வாங்கி இவர்கள் மீண்டும் கொள்ளை லாபம் பெற உதவ வேண்டுமாம்! அதற்கு, ஒரு சின்ன வாடகை வீட்டிலேயே ஊருக்குள் இருந்து கொள்வது மேல். தற்போது ஏற்பட்டிருக்கும் 10-15% ரியல் எஸ்டேட் விலை வீழ்ச்சி என்பது குறைவே! இன்னும் 20% குறைய வேண்டும். ஏனெனில், அந்த அளவுக்கு ஃபிளாட் விலை விஷம் போல் (செயற்கையாக) ஏற்றப்பட்டிருக்கிறது, கடந்த 2-3 வருடங்களில்!

மெல்ல மெல்ல வீட்டுக் கடன் வட்டியை நிச்சயம் 8 சதவிகிதத்திற்குள் கொண்டு வ்ர வேண்டும். அது போல, அடிக்கடி அதை மாற்றாமல் இருத்தல் நலம். ஆனால் இதெல்லாம், ரியல் எஸ்டேட் முதலாளிகள் வீடு/ஃபிளாட்களின் விலையை "நார்மல்" லெவலுக்கு கொண்டு வந்த பிறகு செய்யலாம்.

உண்மையில் இன்று இவர்கள் லக்சுரி அப்பார்ட்மெண்ட் என்று சொல்லிக் கொண்டு 80 லட்சத்தில் இருந்து 1 கோடி வரை வைத்து விற்கும் வீடுகளையே 40 லட்சத்திற்கு தாராளமாக விற்கலாம் அவ்வளவு லாபம் இதில் இருக்கிறது. இவர்களுக்கு எல்லாம் அரசு தரப்பிலிருந்து காசு கொடுக்கக் கூடாது. இவர்கள் 20 லட்சத்தில் ஃபிளாட் கட்டிக் கொடுத்தால் கூட, இன்றிருக்கும் நிலையில் நிறைய பேர் வீடு வாங்க முன் வர மாட்டார்கள்.

இவர்கள் 80 லட்சத்திற்குக் கட்டிக் கொடுக்கும் வீடே கண்றாவியாக இருக்கும் பொழுது 20 லட்சத்தில் எந்த லட்சணத்தில் கட்டிக் கொடுப்பார்கள் என்பதை நினைத்துப் பாருங்கள். இப்பொழுதைக்கு கட்ட ஆரம்பிக்கப் போகும் வீடுகளுக்குக் காசு முதல் போட்டால் அந்த அட்வான்ஸ் திருமபக் கிடைப்பது சிரமம் தான். கட்டி முடித்த வீடுகளை மட்டுமே வாங்க வேண்டும், அது கூட இடத்தைப் பொருத்து. சதுர அடி ரேட் ரூ1750 முதல் ரூ4000 க்குள் இருந்தால் மட்டுமே, வாங்குவது உசிதம்.

எ.அ.பாலா

482. பிராமண மேதைகளை நான் பாராட்டிப் போற்றத் தவறியதில்லை!

இந்த செய்தி இட்லிவடையின் கவனத்தில் சிக்காததால், என் தளத்தில் வலையேற்ற வேண்டிய அவசியம் ஏற்பட்டு விட்டது. இ.வ கட் & பேஸ்ட் பண்ண வேண்டிய மேட்டர் இது! காலத்தின் கட்டாயம் (அல்லது) பிள்ளை இல்லாத வீட்டில் கிழவன் துள்ளி விளையாடறான் என்று எடுத்துக் கொள்ளலாம் :)

சென்னை: "பண்பார்ந்த மேதைகளை நான் பாராட்டிப் போற்றத் தவறியதில்லை' என முதல்வர் கருணாநிதி கூறியுள்ளார். முதல்வர் கருணாநிதி நேற்று வெளியிட்ட அறிக்கையில் கூறியிருப்பதாவது: கலை, இலக்கியம், நாட்டுப் பற்றுக்கான தியாகத்தில் ஈடுபட்டு மறைந்து விட்டவர் குடும்பங்களின் வழித் தோன்றல்களைப் பெருமைப்படுத்துவதும், அவர்களின் குடும்பம் வாடாமல் தழைத்திடச் செய்வதும் கடமையெனக் கொண்டு, ஆட்சிப் பொறுப்பில் இருந்தாலும், இல்லாவிட்டாலும் ஆவன செய்து வருகிறேன்.

திராவிட இயக்கத்தில் இளமைக் காலந் தொட்டே என்னை ஒப்படைத்துக் கொண்டாலும், பிராமண சமுதாயத்தில் பண்பார்ந்த மேதைகளை நான் பாராட்டிப் போற்றத் தவறியதில்லை. மகாகவி பாரதி தொடங்கி, ராஜாஜி, வ.வே.சு.அய்யர், தியாகி ஆர்யா என்கிற பாஷ்யம், உ.வே.சா., கல்கி, ஏ.எஸ்.கே.அய்யங்கார், வெ.சாமிநாத சர்மா, ஆசிரியர் சாவி, நரம்பியல் நிபுணர் டாக்டர் ராமமூர்த்தி என நீண்ட பட்டியல் உண்டு.

வ.ரா.,வின் துணைவி புவனேஸ்வரியை தலைமைச் செயலகத்திற்கு அழைத்து, மாதந்தோறும் அவருக்கு 1,000 ரூபாய் உதவித்தொகை வழங்கும் உத்தரவை ஒப்படைத்தேன். வ.ரா.,வின் நூற்றாண்டு விழாவை அரசு சார்பில் கொண்டாடினோம். திருவள்ளுவர் உருவத்தை தீட்டித் தந்த, வேணுகோபால் சர்மாவின் குடும்ப வாழ்வாதாரத்திற்கு நிதி வழங்கிய பெருமை இந்த அரசுக்கு உண்டு.

பரிதிமாற்கலைஞர் என்ற சூரியநாராயண சாஸ்திரி வாழ்ந்த வீட்டைப் புதுப்பித்து, அவரது உற்றார், உறவினர், பேரன், பேத்திகள் நிரம்பிய பெருங் குடும்பத்தை சிறப்பித்தவன் நான். மன்னித்து மறக்க வேண்டியது "தீது' எனும் ஒன்றைத் தான் என்பதை நான் தெளிந்து நடப்பதைப் போல், தி.மு.க.,வினரும் நடக்க வேண்டும். இவ்வாறு முதல்வர் கருணாநிதி கூறியுள்ளார்.
************************************************
சிரிப்பு வருது சிரிப்பு வருது சிரிக்க சிரிக்க சிரிப்பு வருது சின்ன மனுஷன் பெரிய மனுஷன் செயலப் பார்த்து சிரிப்பு வருது!

மாடு செத்தா மனுஷன் தின்னான் தோல வச்சு மேளம் கட்டி கூத்து கட்டுடா..
அட்றா அட்றா நாக்க முக்க நாக்க முக்க நாக்க முக்க நாக்க முக்க!

நன்றி: தினமலர்

481. தமிழக அரசியல் கோமாளிகளின் கோரிக்கைகளை இந்திய மத்திய அரசு கேட்காது: சிறிலங்கா இராணுவத் தளபதி

பொன்சேகா இப்படிப் திமிராகப் பேசுவதற்கு என்ன காரணம் ? தமிழகத் தலைவர்களின் கையாலாகத்தனத்தைப் பற்றி அவர் தெளிவாக அறிந்திருப்பது தான். இந்த விசயத்தில் மத்திய அரசிடம் திராவிடக் கட்சிகள் உறுதியாகப் பேசி எதுவும் உருப்படியாக செய்ய மாட்டார்கள் என்பதையும், அக்கட்சிகளுக்கு மத்திய அமைச்சரவையில் பங்கு ஒன்றே முக்கியம் என்பதையும் பொன்சேகா கூட தெரிந்து வைத்திருப்பது தான் கொடுமை.
எ.அ.பாலா
*********************************************
[திங்கட்கிழமை, 08 டிசெம்பர் 2008, 05:10 பி.ப ஈழம்] [கொழும்பு நிருபர்]
இந்திய அரசாங்கமானது தமிழ்நாட்டு அரசியல் கோமாளிகளின் கோரிக்கைகளை கேட்கமாட்டாது என்றும் விடுதலைப் புலிகளுடன் கொழும்பு போர் நிறுத்தம் செய்யவேண்டும் என்பதையும் ஏற்றுக்கொள்ளாது என்றும் சிறிலங்காவின் தரைப்படைத் தளபதி சரத் பொன்சேகா தெரிவித்துள்ளார். இது தொடர்பாக சிறிலங்கா அரச சார்பு ஊடகமான டெய்லி நியூஸ் நாளேட்டின் வாரப் பதிப்பான சண்டே ஒப்சேர்வருக்கு சரத் பொன்சேகா வழங்கிய நேர்காணலின் முக்கிய பகுதிகள் வருமாறு:

இலங்கையில் போர் நிறுத்தம் ஏற்படவேண்டும் என்பதில் இந்தியா அக்கறை கொண்டிருக்கவில்லை என நான் உறுதியாக நம்புகின்றேன்.

விடுதலைப் புலிகளை பயங்கரவாத அமைப்பாக இந்தியா அறிவித்துள்ளது. அத்துடன் விடுதலைப் புலிகளின் தலைவர் முன்னாள் பிரதமர் ராஜீவ் காந்தியின் கொலையில் தொடர்புள்ளதன் காரணத்தினால் அவருக்கு சாவொறுப்பு தண்டனை வழங்குவதற்காக கையளிக்கப்படவேண்டும் என்றும் இந்தியா கேட்டுள்ளது.

பம்பாய் குண்டுவெடிப்பு நிகழ்விற்கு பிற்பாடு மன்மோகன்சிங்கின் அரசிற்கு அதிகமான பிரச்சினைகள் உள்ளதோடு இலங்கை பிரச்சினை தொடர்பாக இந்தியா ஏற்கனவே தனது நிலைப்பாட்டினை தெரிவித்தும் உள்ளது.

விடுதலைப் புலிகளுக்கு எதிரான நிலைப்பாட்டினை இந்தியா ஏற்கனவே எடுத்துள்ளதுடன் விடுதலைப் புலிகளுக்கு சார்பான நிலைப்பாட்டினை எடுக்கப்போவதில்லை.

இந்தியா தமிழ் மக்களின் உணர்வலைகள் தொடர்பாக மறுபக்கம் தலையை திருப்பமுடியாது என்பதுடன் படை நடவடிக்கைகளில் அப்பாவி தமிழ் மக்கள் பாதிக்கப்படக்கூடாது என்பதை உறுதிப்படுத்துவதிலும் அக்கறையாக உள்ளது.

இதன் காரணமாகவே தமிழ் மக்கள் பாதிக்கப்படக்கூடாது என்பதற்காகவே இந்தியா உணவு மற்றும் ஏனைய நிவாரணப் பொருட்களை அனுப்புகின்றது.

இந்தியாவின் இந்த 'அப்பாவி தமிழ் பொதுமக்கள் பாதிக்கப்படக்கூடாது' என்ற கரிசனைக்கு சிறிலங்காவானது தனது முழுமையான ஒத்துழைப்பினை வழங்குகின்றது. இந்தியாவும் எம்மிடம் இதனையே எதிர்பார்க்கின்றது.

விடுதலைப் புலிகளின் கடுமையான எதிர்ப்புக்களின் மத்தியிலும் மோசமான வானிலையிலும் சிறிலங்கா படையினர் கொழும்பில் இருந்து 350 கிலோ மீற்றர் தூரத்தில் உள்ள விடுதலைப் புலிகளின் அரசியல் மையமாக முன்னர் விளங்கிய கிளிநொச்சி நகரின் பலமுனைகளில் மிகவும் அண்மையாக சமர்களில் ஈடுபட்டு வருகின்றனர்.

முன்னேறும் எமது படையினர் நிச்சயமாக கிளிநொச்சி மற்றும் முல்லைத்தீவு பிரதேசங்களை விடுதலைப் புலிகளிடம் இருந்து கைப்பற்றுவார்கள். இதன்பின் விடுதலைப் புலிகள் ஒன்றில் கடலுக்குள் குதிக்கவேண்டும் அல்லது சயனைட் வில்லைகளை உட்கொள்ளவேண்டும் என சரத் பொன்சேகா தெரிவித்தார்.

சிறிலங்கா படையினர் விடுதலைப் புலிகளுடன் மோதல்களில் ஈடுபடும்போது பொதுமக்களின் இழப்புக்கள் தொடர்பாக கருத்தில் எடுப்பதில்லை என சரத் பொன்சேகாவிடம் சண்டே ஒப்சேர்வர் கேள்வி எழுப்பிய போது, இந்தக் குற்றச்சாட்டுகள் விடுதலைப் புலிகளினால் லஞ்சம் வழங்கப்பட்ட, ஊழல் மோசடிகளில் ஈடுபடுகின்ற தமிழ்நாட்டு அரசியல்வாதிகளினால் மட்டுமே கூறப்படுகின்றது।

படை நடவடிக்கைகளின்போது பொதுமக்கள் கொல்லப்படுவதில்லை என்பது இவர்களுக்கு நன்கு தெரிந்தபோதும் விடுதலைப் புலிகளுக்கு ஆதரவாக இவர்கள் சில அறிக்கைகளை வெளியிடுகின்றனர். ஏனெனில் இவர்களின் பிழைப்பானது விடுதலைப் புலிகளிடமே தங்கியுள்ளது.

விடுதலைப் புலிகள் முற்றுமுழுதாக அழிக்கப்படுவார்களானால் அரசியல் கோமாளிகளான நெடுமாறன், வைகோ மற்றும் இவர்களைப் போன்ற விடுதலைப் புலிகளை ஆதரவளிப்பவர்கள் தமது வருமானத்தினை இழப்பார்கள்.

விடுதலைப் புலிகளின் நடவடிக்கைகளானது தமிழ்நாட்டிற்கு பாரிய நெருக்கடிகளை ஏற்படுத்தி வருவதுடன் அவர்களது தனிநாடு என்ற கோட்பாடானது இந்தியாவின் இறைமைக்கு மிகவும் அச்சுறுத்தலாகும். பொதுவாக நோக்குமிடத்து விடுதலைப் புலிகளின் தனிநாட்டு கோட்பாடானது இந்தியாவிற்கு ஒரு அச்சுறுத்தலாகும்.

ஏனெனில் இந்தக் கோட்பாடானது தமிழ்நாட்டிற்கும் பரவக்கூடும். தற்போது தமிழ்நாடானது இந்திய அரசிற்கு எதிராக போராட்டங்களை நடத்துவதில் இருந்தும் விடுதலைப் புலிகளின் சார்பாக நிலைப்பாட்டினை எடுப்பதில் இருந்தும் இது நீரூபணமாகின்றது என சரத் பொன்சேகா மேலும் தெரிவித்தார்.

நன்றி: புதினம்.காம்

480. இந்தியா மீது பாக். அணுகுண்டு வீசுமா?

இந்தியா மீது அணு குண்டு வீசப்பட்டால் பின்வரும் சம்பவங்கள் தொடரும்.

1. மன்மோகன் டி வி யில் தோன்றி தான் இதை வன்மையாகக் கண்டிப்பதாகவும் இந்தியாவின் பக்கத்து நாடுகளின் ஒன்றே இந்த அணுகுண்டை வீசியிருப்பதாக நான் 'தீவிரமாக' சந்தேகப்படுவதாகவும் இதற்கு இந்திய அரசு தக்கவிதத்தில், கலந்து ஆலோசித்துப் பதில் சொல்லும் என்றும் கூறுவார்

2. காண்டலிசா ரைஸுக்கு பதிலாக ஹிலரி இந்தியா பிரயாணப்பட்டு "இந்தியா பொறுமை காக்க வேண்டும் ஒரே ஒரு நகரத்தில் தானே அணுகுண்டு போட்டிருக்கிறார்கள் அவர்கள் என்ன இந்தியா முழுக்கவா போட்டார்கள் நான் அவர்களிடம் சொல்லி இனிமேல் ஒழுங்காக இருக்கச் சொல்கிறேன் நீங்கள் அமைதி காக்க வேண்டும் இல்லாவிட்டால் தாலிபான் எங்களை ஆப்கானிஸ்தானுக்குள் மாறி மாறி அடிப்பார்கள், 'நாம்' ஒன்று சேர்ந்து war against terror ல் வெல்வோம்!" என்று சொல்லி விட்டுப் போவார். அவரைத் தொடர்ந்து பிற குஞ்சுக் குழுவான்கள் வந்து அதே வார்த்தைகளை பல விதமாக பிரயோகித்து விட்டுப் போவார்கள்

3. பாக்கிஸ்தான் பிரதமர் 'இந்த அணுகுண்டு பாக்கிஸ்தானில் இருந்து வீசப் பட்டிருக்கலாம். இருந்தாலும் அதற்கும் பாக்கிஸ்தான் அரசுக்கும் சம்பந்தமில்லை(!) அப்படி வீசினோம் என்பதற்கு என்ன ஆதாரம் இருக்கிறது? அப்படி ஆதாரம் கொடுத்தால் நாங்கள் கண்டு பிடித்து நிச்சயம் நடவடிக்கை எடுப்போம். ஆனால் யார் மீது எடுப்பது என்பதில் சின்னக் குழப்பம் உள்ளது. மேலும், ஐ.எஸ்.ஐ ஒரு non-state actor!! அணுகுண்டு வீசியதை நாங்கள் கண்டிக்கிறோம் அதே நேரத்தில் கொஞ்சம் மகிழ்ச்சியும் அடைகிறோம்' என்பார்

4. உலகம் முழுக்க மீடியாக்கள் 'பாக்கிஸ்தான் தான் அணுகுண்டு போட்டதற்கு என்ன ஆதாரம் என்பதை இன்னும் இந்தியா அளிக்கவில்லை' என்பார்கள்

5. இந்தியாவில் உள்ள கம்யூனிஸ்டுகள் 'அணுகுண்டு போட்டது பாக்கிஸ்தான் தான் என்று தடாலடியாகச் சொல்லக் கூடாது. 'புலன் விசாரணை' செய்து கண்டு பிடிக்க வேண்டும், அதற்கு சீனாவிடம் ஒத்துழைப்புக் கேளுங்கள், அமெரிக்காவின் அடிவருடியதால் தான் இந்த நிலைமை வந்தது' என்று சொல்வார்கள்.

6. இந்து பத்திரிகை, அந்தோணி மார்க்ஸ் ஆகியோர் 'இதை 'கடுமையாக' கண்டிக்கும் அதே வேளையில் ஏன் போட்டார்கள் என்பதற்கான நியாயமான காரணத்தை நாம் ஆராயந்து அவர்களுக்குள்ள மனக்குறையைக் களைய வேண்டும்' என்பார்கள். இ.பா 'காஷ்மீரைக் கொடுத்திருந்தால் இப்படி அணுகுண்டு போட்டிருப்பார்களா? என் வீட்டுக்கு முன்னாடி கூடத்தான் தீபாவளி அன்று சிறுவர்கள் அணுகுண்டு போட்டார்கள் அதற்கெல்லாம் நான் வருத்தமா பட்டேன். அணுகுண்டு போட்டவர்களுக்கு ஆண்மை இருக்கிறதா இல்லை அந்தக் குறையைப் போக்கப் போட்டார்களா என்பதை நாம் பாரபட்சம் இன்றி ஆய்வு செய்ய வேண்டும்' என்பார்!

7. நமது போலி செக்யூலரிஸ்ட்கள், அச்ச உணர்வின் காரணமாக அவர்கள் அணுகுண்டு போட்டிருக்கிறார்கள். அதற்கு அவர்களது ஏழ்மையே காரணம். அச்ச உணர்வையும் தரித்தரத்தையும் நீக்க வழிவகை செய்தல் வேண்டும் என்பார்கள். போ.செக்யூலரிஸ்ட்களை, தேசியத்தில் மிக்க நம்பிக்கை உள்ளவர்கள் கடுமையாக விமர்சனம் செய்வார்கள். நடுநிலைவாதிகள் தேசியவாதிகளுக்கு 'இவ்வளவு சினம் ஆகாது' என்று அறிவுறுத்துவார்கள் !

8. பிஜேபி POTA இல்லாததால் தான் இந்த நிலைமை ஏற்பட்டது, அதை மீண்டும் கொண்டு வர வேண்டும் என்று ஆவேசப்படும்

9. 'குடும்ப ஆரோக்கியத்தை ஈஸியா எடுத்துக்கலாமா? அதனால் தான் நான் அதில் முழுகவனம் செலுத்துகிறேன்' என்றவாறு கருணாநிதி தன் பணியில் மூழ்கியிருப்பார். ஜெயலலிதா 'கருணாநிதியின் மைனாரிட்டி அரசு தான் இந்த நிலைமைக்கு காரணம். அதனால், அவர் தார்மீக பொறுப்பேற்று பதவி விலக வேண்டும். திமுக ஆட்சியை விட்டு விலகுவது அதை விட உசிதம்!' என்று தனது 788-வது கோப அறிக்கையை விடுவார்!

10. நமது இந்திய நியூஸ் மீடியா சேனல்கள், குண்டு வெடித்ததையும், மக்கள் கும்பல் கும்பலாக செத்துப் போனதையும் மிக அருகில் இருந்து படம் பிடித்து, அக்காட்சிகளை விடாமல் 24/7 ஒளிபரப்புவார்கள்! "Breaking News-ல் நாங்கள் தான் நம்பர் ஒன். இவ்வளவு அருகில் சென்று படம் பிடித்து உங்களுக்கு exclusive காட்சிகளையும் செய்திகளையும் தருவது நாங்கள் மட்டுமே! கடந்த நான்கு நாட்களில் எங்கள் கவரேஜை 50 லட்சம் பேர் பார்த்திருக்கிறீர்கள், உங்களுக்கு நன்றி" என்று எப்போதும் போல போட்டி போட்டுக் கொண்டு விளம்பரத்துக்கு அலைவார்கள்!

எ.அ.பாலா

பி.கு: மக்களே, மேற்கூறியது போல உங்களுக்கு ஏதாவது ஐடியா தோன்றினால், பின்னூட்டத்தில் சொல்லவும் !

479. கடவுள்களின் பள்ளத்தாக்கு! - இது தான்டா சுஜாதா!

சுஜாதாவின் இந்தக் கட்டுரையை வாசித்தவுடன் பதிய வேண்டும் என்று தோன்றியது.  ஒரு புண்ணியத் தல பயணக் கட்டுரையைக் கூட இவ்வளவு சுவாரசியமாக, மிளிரும் நகைச்சுவையுடன், வாசகனின் நெஞ்சைத் தொடும் வகையில் எழுதுவது வாத்தியாருக்கு மட்டுமே வசப்படும்!!!  வாசகரைக் கடடிப் போடும் இந்த விவரணையும், வர்ணனையும் வாத்தியாருக்கு மட்டுமே சாத்தியம்!! மனுஷன் போய் சேர்ந்து விட்டார் :-( 

 

சுஜாதாவைப் போல் ஜனரஞ்சகமாக (கதை/கட்டுரை) எழுத  இப்போது ஆள் கிடையாது.  அவரது திறமையில் ஒரு 20-25% தான் இன்றைய எழுத்தாளர்ளிடம் இருக்கிறது. அதற்கே என்ன ஒரு கர்வம்/அலட்டல் :-(

 

எ.அ.பாலா

 

**********************************************

'திவ்ய தேச க்ஷேத்ர தீர்த்த யாத்திரை செய்யக் குதூகலமுள்ள பக்தர்களுக்கு, அவை சம்பந்தமான சகல விவரங்களையும் தெரிவிப் பதற்கான பத்ரி யாத்திரை விளக்கு'

- மேற்கண்ட தலைப்பின் கீழ் பிரதிவாதி பயங்கரம் அண்ணங்க ராச்சாரியார் 40 வருஷங்களுக்கு முன் ஒரு சுவாரஸ்யமான புத்தகம் எழுதியிருக்கிறார். அவர் போனபோது யாத்திரையில் உள்ள கஷ்ட-சுகங்களையும், தபால் ஆபீஸ் விவரங்கள் உட்பட்ட காட்சிகளையும் சம்ஸ்கிருதமும் தமிழும் மயங்கிக் கலந்த ஒரு வசீகர வசன நடையில் விவரித்திருக்கிறார்.

8-ம் நூற்றாண்டைச் சேர்ந்த திருமங்கையாழ்வார் தன் பாசுரத்தில்... 'முதுகு பற்றிக் கைத் தலத்தால் முன்னொரு கோல் ஊன்றி, விதிர்விதிர்த்துக் கண் சுழன்று மேற்கிளை கொண்டிருமி, இது வென் அப்பர் முத்தவா றென்று இளையவர் ஏசா முன், மது உண் வண்டு பண்கள் பாடும் வதரி வணங்குதுமே' என்று முதுகில் ஒரு கை வைத்துக் குச்சி ஊன்றி இருமிக்கொண்டு, மேல் மூச்சு வாங்கிக்கொண்டு - சின்னப் பையன்கள் 'தாத்தா போறார் பாரு' என்று கேலி பண்ணுவதற்கு முன்னமே பத்ரி போய் சேவித்து விடுவோம் என்று வற்புறுத்தியுள்ளார். எனவே, பத்ரி நாராயணனை வணங்கப் பயணப்படத் தீர்மானித்து விட்டேன்.

முதலில், ஆக்ஸ்போர்டு அட்லாஸ் ஒன்று வாங்கிப் பார்த்தால், பத்ரி, உத்தரப்பிரதேசத்தில் இந்தியாவின் உச்சந்தலையில் திபெத், சைனா எல்லைகளின் அருகில் இருக்கிறது. இருந்தும், அதற்குப் போகிற வழிகள், பயண ஏற்பாடுகள் எல்லாம் மிகச் சுலபம். காசு வேண்டும்; அவ்வளவுதான். டெல்லிக்குப் போய்ப் பணத்தைக் கொடுக்க ஒப்புக் கொண்டவுடன், பணிக்கர் ட்ராவல்ஸ் 15-வது நிமிஷத்தில் காரை டெல்லி ஏஷியாட் கெஸ்ட் அவுஸூக்கு அனுப்பி விட்டார்கள். பஸ்ஸிலும் போகலாம்.

நான் 20 வருஷங்களுக்கு முன் டெல்லியில் இருந்தபோது கற்றுக் கொண்ட இந்தியைச் சற்றே தூசு தட்டி, டிரைவர் பேர் கேட்டேன். ''நாராயண் சிங்'' என்றான் அந்த இளைஞன்.

'ஆகா... பேரே என்ன சகுனமாக இருக்கிறது! பகவான் நாராயணனே நமக்குச் சாரதி ரூபத்தில் வந்துவிட்டான். இனிமேல் நமக்கு என்ன பயம்!' என்று நிம்மதியாக காரில் ஏறிக் கொண்டோம் (நான், மனைவி, மாமனார், மாமியார்).

நம்பிக்கை தப்பு! நாராயண் சிங் எடுத்த எடுப்பிலேயே ரூர்க்கி போகும் ரஸ்தாவில் 100 கிலோமீட்டரைத் தொட்டான். மலைப்பாதைகளில் சரேல் சரேல் என்று தெலுங்குப் படத்தின் க்ளைமாக்ஸ் காட்சி போல் ஓட்டினான். வாயால் பால் பாயின்ட்டைக் கவ்விக் கொண்டு, இரண்டு கைகளையும் பயன்படுத்தி கார் காஸெட்டை மாற்றி, இமாசலி பாஷையில் நாட்டுப் பாடல்களைக் கேட்டதும் இன்னும் உற்சாகமாகி, மாண்டிகார்லோ போல கொண்டை ஊசிகளைச் சாப்பிட்டான். அனைவருக்கும் வயிற்றில் பயம் பிரவாகிக்க, ''நாராயண் சிங்... தேக்கோ! பத்ரி போனால் மோட்சம் கிடைக்கும் என்றாலும், இத்தனை சீக்கிரத்தில் போக விரும்பவில்லை'' என்று அவனிடம் சொல்ல விழைந்து, நான் பேசிய இந்தி போதாததால் (குளிர்)... சும்மா நகங்களை ருசித்துக் கொண்டு, முழங்கால்களை ஒட்ட வைத்துக்கொண்டு, பகவான் நாராயணன் மேலும், அம்பாஸடரின் சஸ்பென்ஷன் மேலும் நம்பிக்கை வைத்துச் சென்றோம்.

நாங்கள் போன பகுதி உத்தரப் பிரதேசத்தின் கடுவால் ஜில்லாவின் மலைப் பிரதேசம். இமாலய மலைப் பர்வதங்களின் பக்கவாட்டில் கீறி கோடு போட்டாற்போல பார்டர் ரோடு இலாகா சாமர்த்தியமாக அமைத்த பாதை. ஒரு மலையில் ஏறி இறங்கி, ஒரு பெய்லி பாலத்தைக் கடந்து, அடுத்த மலையில் ஏறி மறுபடி இறங்கிச் செல்லும்போது, கூடவே அலகாநந்தா நதி பிடிவாதமாகத் தொடர்கிறது. சில வேளை சிமென்ட் பச்சையில், சில வேளை வெண்மையாக, சில வேளை அகலமாக அருகிலேயே, சில வேளை நரைமுடிபோல் மெல்லிசாகத் தெரியும் ஆழத்தில்! அநேக உற்சாகத்துடன் கற்களை உருட்டிக் கொண்டு இங்கேயும் அங்கேயும் நீரருவிகள் சுதந்திரம் எடுத்துக்கொண்டு, சாலையின் குறுக்கே உற்சாகமாகச் செல்ல... எந்தச் சமயத்திலும் கல் குன்றோ மலைச்சரிவோ எதிர் லாரியோ வரக்கூடிய... உடல் பூரா அட்ரினலின் பிரவகிக்கும் பயணம். ஆழ்வார் சொன்னது சத்தியமே! இளைய வயதிலேயே செல்ல வேண்டிய பயணம். இந்த ரோடுகளைத் தினம் தினம் இயற்கையோடு போராடித் திறந்து வைத்திருப்பதே பெரிய சாதனைதான்!

நாராயண் சிங் உற்சாகமாக, அங்கங்கே இந்தப் பாதையில் விழுந்து நொறுங்கிய பஸ்களையும் அலகா நந்தாவில் அடித்துக் கொண்டு போன உடல்களையும் பற்றி விவரித்து... குளிர் போதாது என்று உபரியாக நடுங்க வைத்துக்கொண்டிருந்தான். புல்டோஸர்களும், டீசல் நாகரிகமும், எஸ்.டீ.டி-யும், ஸாட்டிலைட்டும் உள்ள இந்தக் காலத்திலேயே இத்தனை கஷ்டப்படும்போது, ஆதிசங்கரர் இங்கே வந்து இந்தக் கோயிலை ஸ்தாபித்திருக்கிறார்; திருமங்கையாழ்வார் - தேவப்ரயாகை, ஜோஷிமட், பத்ரி மூன்று இடங்களுக்கும் வந்து பாடியிருக்கிறார் என்பது ஆச்சர்யமாக இருக்கிறது.

பத்ரிகாசிரமத்துக்குப் போகும் வழி உங்களுக்கெல்லாம் தெரியும். டெல்லி போய் அங்கிருந்து ஹரித்வார், ரிஷி கேசம், தேவப்ரயாக், கர்ணப்ரயாக், நந்தப்ரயாக், ருத்ரப்ரயாக், விஷ்ணுப்ரயாக் என்று அங்கங்கே அலகாநந்தா வில் பாகீரதி, மந்தாகினி போன்ற நதிகள் வந்து கலக்கும். சுமார் அரை டஜன் ப்ரயாகைகளைக் கடந்து நகர் (காஷ்மீரத்தது அல்ல). அதன்பின் பீப்பல்கோட்டி, ஜோஷிமட், பத்ரிகாசிரமம். 'கடவுள்களின் பள்ளத்தாக்கு' என்று சொல்லப்படும் சுந்தரச் சரிவு. வீழ்ச்சி. உயரம் 10,350 அடி. பாதை ஹரித்வாரிலிருந்து 333 கி.மீ.

பத்ரிக்குச் செல்ல விரும்புவர்கள் வீட்டில் உள்ள அத்தனைக் கம்பளி சமா சாரங்களையும் கொண்டு செல்லவும். (பயங்கரமாகக் குளிரும்). ஊறுகாய் (சப்பாத்தி சாப்பிட்டு நாக்கு செத்துப் போகும்). ஃப்ளாஸ்க் (வெந்நீர், டீ போன்ற சமாசாரங்களுக்கு). டார்ச் லைட் (உத்தரப் பிரதேசம் முழுவதும் வோல்டேஜ் குறைவு அல்லது பவர்கட்). உங்களிடம் இருக்கும் பழைய சட்டைகள் (ஏழைகளுக்குக் கொடுக்க. விவரம் பின்னால்). செம்பு (தலையில் மொண்டு குளிக்க. நதியில் இறங்கமுடியாது. குளிரில் சுருங்கிப் போய் முற்றுப்புள்ளியாகிவிடுவீர்கள்). முதலுதவி, ரத்தக்காயம் முதலானவற்றுக்கு மருந்து மாயங்கள், சகல உபாதைகளுக்கும் மாத்திரைகள். டைகர்பாம், அமிர்தாஞ்சன். மூச்சு முட்டினால் மார்பைத் தேய்த்து விட மனைவி.

உத்தரப்பிரதேசத்தில் மிக ஏழ்மையான பகுதி இந்த கடுவால் ஜில்லா. பெண்கள் மூன்று வயதிலிருந்தே கடுமையாக உழைக் கிறார்கள். ஆண்கள் இத்தனைக் குளிரிலும் காலில் செருப்பில்லாமல் பாத்திரம் கழுவுகிறார்கள். அதிகாலையில் வெந்நீர் போட் டுத் தருகிறார்கள். எங்கே நின்றாலும், அங்கே மிக அழகான குழந்தைகளைப் பார்க்கலாம்... பிச்சை கேட்பதை!

கடுவால் பிரதேசத்துக் குழந்தைகளின் கன்னங்களில் மட்டும் ஆப்பிள் தெரிய, நான்கு வயதுச் சிறுமியின் முதுகில் தூளி போட்டு அதன் தங்கையோ, தம்பியோ எட்டிப்பார்க்க... குழந்தைகள் இருவரும் கைநீட்டி, ''சேட் பைசா தே! மாஜி பைசா தே!'' என்கிறார்கள். அம்மா, அப்பா என்ற வார்த்தைகளுக்கு முன்னமேயே 'பைசா தே' கற்றுக் கொடுக்கப் பட்டு, பைசா என்பதன் அர்த்தமோ, பிச்சை என்பதன் கொடுமையோ தெரியாத அறியாமையி லேயே பிச்சையெடுக்கத் துவங்கி விட்ட கடவுள் துண்டங்கள்!  இத்தனை வருஷம் ஆகியும் ஆதார ஏழ்மையை ஒழிக்க முடிய வில்லையே... எங்கே தப்பு? ஜன நாயகத்தைத் தூக்கி எறிந்துவிட லாமா? எல்லாக் குழந்தைகளும் விதிவிலக்கின்றி கந்தலாக, மிகக் கந்தலாக உடுத்திக்கொண்டு பிச்சை எடுக்கும் காட்சி உள்ளத்தை உருக்குகிறது. ஆகவேதான் பத்ரிக் குச் செல்லும்போது, பீரோ பீரோவாகக் குவித்து வைத்திருக்கும் பழைய துணிகளை எடுத்துச் சென்று அவர்களுக்குக் கொடுங் கள். பத்ரி நாராயணன் மிகவும் சந்தோஷப்படுவார்.

'பத்ரி' என்றால் இலந்தை மரமாம். இலந்தை மரத்தின் கீழ் நர நாராயணன் ஆயிரமாயிரம் வருஷங்களாக மோனத்தவத்தில் இருந்ததாகவும், பிற்காலத்தில் நர நாராயணன்... அர்ஜுனன் கிருஷ்ணனாக அவதரித்ததாகவும் அவர் தவமிருந்து ஏறக்குறைய கொன்று விட்ட ராட்சஸன் கர்ணனாகப் பிறந்ததாகவும் பலவிதமான கதைகள் சொல்கிறார்கள்.

கொஞ்சம் சரித்திர உண்மைகள்... இந்தக் கோயில் 8-ம் நூற்றாண்டிலிருந்து பௌத்த ஆதிக்கத்தில் இருந்தது. ஆதிசங்கரரால் வைணவத் தலமாக மாற்றப்பட்டு, இங்கே ஒரு பீடம் அமைத்தது (தாமம் என்று சொல்கிறார்கள்). உண்மைதான். இல்லாவிட்டால் கேரளத்து நம்பூதிரிகள் இங்கே பூஜை செய்வதை விளக்கவே முடியாது. திருமங்கைமன்னன் 20 பாட்டுக்கள் பாடியிருக்கிறார். ஜோஷிமட்தான் இவர் பாடிய 'பிரதி' என்கிறார்கள். பெரியாழ்வார் 'கண்டம் கடினகர்' என்று, அலகாநந்தா முடிந்து கங்கை ஆரம்பிக்கும் தேவப்ரயாகையைப் பாடியிருக்கிறார். பத்ரி, 1937 வரை நம்பூதிரிகளின் ராஜ்யமாக இருந்து பிரிட்டிஷாரால் உத்தரப்பிரதேசம் வசம் ஒப்படைக்கப்பட்டது.

மலையடிவாரத்தில் சிவப்பும் தங்கமுமாக இத்தனை பிரயாசைக்குப் பின் சற்றே ஏமாற்றம் தரும், சற்றே குருத்வாராவை நினைவுபடுத்தும் அமைப்புள்ள சிவன் கோயில். விக்கிரகங்கள் குபேரன், கருடன், லக்ஷ்மி, நாரதர், வீற்றிருந்த திருக்கோலத்தில் இரண்டு திருக்கரங்களுடன் நாராயணன். (புத்தர்?) வருஷம் பூராவும் வெந்நீர் சொரியும் தப்த குண்டம். அதில் உற்சாகமாகக் குளிக்கும் சர்தார்ஜிகள் (ஆம், அவர்களும் வருகிறார்கள்). 21 தலைமுறை முன்னோர்களுக்கும் பிண்டப்ர தானம் செய்ய அலகாநந்தாவின் கரையில் கோட்டு போட்டுக் கொண்டு மந்திரம் சொல்லும் பண்டாக்கள். தெலுங்கும் கன்னடமும் பெங்காலியும் இந்தியும் பஞ்சாபியும் ஒலிக்கும் ஒரு மினி இந்தியாவின் பக்தர் கூட்டம்.

வழக்கம்போல இச்சிலி பிச்சிலி சாமான்கள் விற்கும் கடைகள், இட்லி தோசை கிடைக்கும் தென்னிந்திய ஓட்டல்கள். என்ன... இட்லி கொஞ்சம் கல்லாக இருக்கும். அடிக்கு அடி சாமியார்கள், யோகிகள்...

இந்து மதத்தின் அத்தனை விசித்திரங்களும் பளிச்சிடும் பத்ரி எல்லையை அடைந்தவுடன் எனக்கு ஏற்பட்ட முதல் உணர்ச்சி, காப்பாற்றப்பட்டோம்... தப்பித்தோம் என்பது தான்! மானுடர்களாகிய நாம் எத்தனைச் சிறியவர்கள், அற்பமானவர்கள் என்பதை வானளாவிய பனித்தொப்பி போட்ட மலையுச்சிகளை நோக்கும்போது, இயற்கையின் மௌனமான கோபத்துடன் உணர முடிகிறது.

நன்றி: ஆ.விகடன்